Մարիա Շարապովան չդիմացավ կամերունցի թխամորթ ֆուտբոլիստի հետ մրցակցությանը: Սակայն այստեղ ֆինանսական ճգնաժամի երկրորդ ալիքը ոչ մի կապ չունի:
Թենիսիստուհի Շարապովան, որ երկար տարիներ անվերապահորեն գլխավորում էր Ռուսաստանի ամենահարուստ մարզիկների ցուցակը, մրցաշրջան 2011-ում հարկադրաբար առաջատարի դերը զիջել է կամերունցի ֆուտբոլիստ, Մախաչկալայի «Անժի» ֆուտբոլային ակումբի նորընծա խաղացող Սամյուել Էտո’ Օ-ին, որի եկամուտն անցնող մրցաշրջանում կազմել է 26 մլն 400 հազար եւրո:
Ռուսական լրատվամիջոցները հատուկ ընդգծում են, որ Շարապովայի գործերն իրականում վատ չեն. Մաշան միայն թենիսով վաստակել է 2,9 մլն եւրո ու եւս 20 միլիոն` գովազդներից ու հովանավորներից: Սակայն աշխարհի ամենահաջողակ մարզուհին ի վիճակի չի եղել դիմակայել ֆինանսական ներդրումների այն «պայթյունին», որ եղավ մինչ այդ համեստ Մախաչկալայում: Այս քաղաքը միայն համաշխարհային 1-ին մեծության աստղեր ձեռք բերելու համար մեկ մրցաշրջանում հատկացրել է 100 միլիոն եւրո: ԶԼՄ-ների հավաստմամբ, 50 մլն. էլ ծախսվել է միայն նրանց աշխատավարձը վճարելու համար: Ուստի միանգամայն բնական է, որ Ռուսաստանի ամենաթանկ արժեցող մարզիկների լավագույն տասնյակում միայն Մախաչկալան երեք ներկայացուցիչ ունի: Իսկ Էտո’ Օ-ն դարձել է նաեւ աշխարհի ամենից ավելի բարձր վճարվող մարզիկներից մեկը: Եվ այն աստիճանի, որ անգամ Կրիշտիանու Ռոնալդուն եւ Լիոնել Մեսսին ստիպված են բավարարվել ավելի ցածր էշելոններում սփոփիչ տեղերով:
Աշոտ ՀԱԿՈԲՅԱՆ
Կարդացեք նաև
