«ՀԱԿ-ն իսկապես մտահոգված է, որ երկրում արդար, ժողովրդավարական ընտրություններ լինեն, վերջապես այդ ընտրությունների արդյունքում իշխանափոխություն լինի: Եվ այն քաղաքական ուժերը , որոնք հասկանում են, որ ՀՀԿ-ը կամ կոալիցիա կոչվածը, Սերժ Սարգսյանի գլխավորությամբ, Հայաստանին ոչինչ չեն տվել, ոչ մի ծրագիր չեն իրագործել, երկիրը կանգնեցրել են կործանման առջեւ՝ իրենց առջեւ խնդիր դնեն այս իշխանություններից ազատվել: Դա ՀԱԿ-ի գերագույն նպատակն է: Մնացած մանր-մունր կծմծոցին՝ ով ի՞նչ ասաց, ե՞րբ ասաց…դրանից վեր պիտի գտնվեն եւ հասկանան, որ գերխնդիրն այլ է»,- Aravot.am-ի հետ զրույցում կարծիք հայտնեց ՀԱԿ անդամ , Հայաստանի լիբերալ կուսակցության ղեկավար Հովհաննես Հովհաննիսյանը:
Հիշեցնենք, որ Aravot.am-ի հետ զրույցում մեկնաբանելով ՀԱԿ համակարգող Լեւոն Զուրաբյանի հայտարարությունը, թե ՀԱԿ-ը պատրաստակամ է ազատ, արդար ընտրություններ անցկացնելու հարցում շահագրգիռ քաղաքական ուժերի հետ մշակել Ընտրական օրենսգրքում փոփոխություններ առաջարկող միասնական պլատֆորմ՝ «Ժառանգություն» խմբակցության ղեկավար Ստեփան Սաֆարյանը նկատել էր. «Այն ժամանակ, երբ մենք բոլորս միասին պիտի պայքարեինք ԸՕ–ում փոփոխություններ անելու համար՝ ՀԱԿ–ը 2010թ. հոկտեմբեր 22-ի Ընտրական օրենսգրքի վերաբերյալ իր հայտարարության մեջ շեշտում էր՝ « Ընտրական օրենսգրքի նման քննարկումներ նախաձեռնելով, իշխանությունը փորձում է պատրանք ստեղծել, թե, իբր, մինչ այս ընտրություններում կատարված համատարած կեղծիքների ու ապօրինությունների պատճառը օրենսդրության անկատարությունն է»։ Կամ՝ «ՀԱԿ–ը եւ ցանկացած այլ քաղաքական ուժ, մտնելով այս քննարկման մեջ՝ ակամա մասնակից կդառնա վարչախմբի գործած՝ ընտրական կեղծիքների ու բռնության միջոցով իշխանության յուրացման ծանրագույն հանցանքը պարտակելուն»: Այն ժամանակ «պարտակողը» մենք էինք՝ «Ժառանգությունն» ու ՀՅԴ–ն, որովհետեւ ՀԱԿ–ը այդ քննարկումներին չէր մասնակցում, իսկ մենք մասնակցում էինք»:
