Նոյեմբերի 15-ին վրաերթի ենթարկված 56- ամյա Հակոբ Հակոբյանը թեեւ պնդում է, որ արձանագրել է իրեն վրաերթի ենթարկած մեքենայի համարը՝ 10, 448, ու հանձնել գործը քննող քննիչին, բայց մինչ օրս գործին ընթացք չի տրվել ու չեն հայտնաբերել մեղավորին:
Տուժողի կինը՝ Ռոզա Հարությունյանը, Aravot.am-ին պատմեց, որ ամուսնու հետ դեպքը տեղի է ունեցել երեկոյան ժամը 10:30-ի մոտակայքում՝ ավտոկայանի մոտ. «Մեքենան անցել է ամուսնուս ոտքերի վրայով: Հետո մեքենայից իջել են երկու հոգի՝ վարորդը երիտասարդ, կողքի ուղեւորը՝ տարեց մոտեցել են ամուսնուս, երեւի չափել վնասվածքի աստիճանը ու պպտվել նստել են մեքենա ու փախել»:
Ռ. Հարությունյանի խոսքերով, ամուսինը ծանր կոտրվածքներով տեղափոխվել է Էրեբունի հիվանդանոց՝ տրավմատոլոգիայի բաժին .«Ես թոշակառու եմ, ու ինձ համար մեծ դժվարություն է բժշկական ծախսերը հոգալը»:
Ոստիկանությունից Aravot.am-ին պարզաբանեցին, որ քաղաքացու նշած պետհամարանիշն առանց տառերի է ու ամբողջ հանրապետությունում այդ համարանիշով շատ մեքենաներ կան: Ոստիկանույթունից խոստացան, որ առաջիկա շաբաթներին հանցագործություն կատարած մեղավորներին «հաստատ կբացահայտեն» եւ այս դեպքի հետ կապված էլ կներկայացնեն այլ մանրամասներ:
Կարդացեք նաև
Արփինե ՍԻՄՈՆՅԱՆ
