Այսօր Հայաստանում Ֆրանսիական համալսարանում ԵՄ աջակցությամբ տեղի ունեցավ «Զանգվածային լրատվամիջոցները եւ խոսքի ազատությունը. մասնագիտական պատասխանատվության եւ իրականության միջեւ» խորագրով համաժողով:
Լսատեսողական հաղորդակցության իրավունքի ինստիտուտի տնօրեն եւ Թուլուզ 1 Կապիտոլ համալսարանի դասախոս, ԵՄ փորձագետ Սերժ Ռեգուրն անդրադարձավ լրագրողներին հանդիպող դժվարություններին` նշելով, որ մեր երկրներում երկու սահմանափակում կա` կառավարությունների կողմից սկզբնաղբյուրների պահպանում եւ լրագրողների անազատություն. «Կան, այսպես ասած, «վարձու» լրագրողներ եւ ունեն ղեկավարներ, հետեւաբար` նրանց ազատությունը պետք է համապատասխանի գործատուների պահանջներին»: Բանախոսը հավելեց, որ նոր կազմավորվող լրատվամիջոցները, մասնավորապես` համացանցը, հանդիպում են լուրջ դժվարությունների. «Յուրաքանչյուր ոք կարող է համացանցում ցանկացած տեղեկատվություն տարածել, ինչը դժվար վերահսկելի է: Այստեղ առկա է մասնագիտական ազնվության խնդիրը»:
Խոսքի ազատության պաշտպանության կոմիտեի նախագահ, ազգային փորձագետ Աշոտ Մելիքյանը նշեց, որ ոչինչ բացարձակ ազատ չի լինում, այդ թվում` խոսքի ազատությունը. «Այն ունի տարբեր մակարդակներ, եւ լրատվամիջոցները պետք է պայքարեն մեր ազատության մակարդակը բարձրացնելու համար»: Ա. Մելիքյանի խոսքերով` ներկայիս դատական գործընթացներն ավելի շատ կապված են քննադատության հանդեպ անհանդուրժողականության հետ. «Երբ դա լինում է մի երկրում, որտեղ անկախ դատական համակարգ չկա, իսկ քաղաքական մշակույթը չի հասել այն մակարդակին, որ քննադատության հանդեպ լինի հանդուրժող, միայն օրենսդրական փոփոխություններով լուրջ հաջողությունների դժվար է հասնել»:
Հայաստանում ԵՄ պատվիրակության ղեկավարի պաշտոնակատար Օննօ Սիմոնսի տեղեկացմամբ`ԵՄ-ն կիրառում է ԶԼՄ-ների բազմակարծության սկզբունքը` համարելով, որ այն մեծ պատասխանատվություն պետք է առաջացնի միջազգային հանրության համար. «ԵՄ-ն աջակցում է օրենսդրական բարեփոխումների ոլորտում Հայաստանի ներդրած ջանքերին` լրագրողների բազմակարծության ամրապնդման հարցում»:
Կարդացեք նաև
«Զանգվածային լրատվամիջոցները եւ խոսքի ազատությունը. մասնագիտական պատասխանատվության եվ իրականության միջեւ» խորագրով համաժողովը ԵՄ պատվիրակության կողմից ֆինանսավորվող եւ Ֆրանսիական համալսարանի կողմից իրականացվող դասախոսությունների շարքում յոթերորդն է: Նախորդ համաժողովները վերաբերում էին ԵՄ լեզվական քաղաքականությանը, մարդու իրավունքներին եւ ժողովրդավարությանը, Մտավոր սեփականության իրավունքին, Այլընտրանքային լրատվամիջոցներին:
Լուիզա ՍՈՒՔԻԱՍՅԱՆ
