ՀՀ նախագահի պաշտոնական կայքից եւ ԶԼՄ-ներից տեղեկանում ենք, որ Հռոմի եւ Երեւանի քաղաքապետերը նախագահ Սերժ Սարգսյանի ներկայությամբ Հռոմի կենտրոնում՝ Բրասկի թանգարանի դիմաց, օրերս բացել են ՅՈՒՆԵՍԿՕ-ի կողմից «Մարդկության ոչ նյութական մշակութային ժառանգության» ցանկում ընդգրկված 13-րդ դարի հայկական խաչքարը:
Ի դեպ, ըստ ՀՀ օրենսդրության, Հայաստանի Հանրապետության տարածքից արգելվում է արտահանել մշակութային ժառանգության առանձնակի արժեքավոր մշակութային արժեքները` անկախ դրանց uտեղծման ժամանակից կամ պատկանելությունից , դրանք կարելի է միայն ժամանակավոր արտահանել:
ՀՀ մշակույթի նախարարության կայքում նշված է ընդամենը Բրասկի թանգարանում ժամանակավոր ցուցադրության ներկայացված նշումների ցանկը, իսկ խաչքարի՝ Հռոմում ժամանակավոր «հանգրվանելու» մասին որեւէ խոսք չկա:
Aravot.am-ը ՀՀ մշակույթի նախարարության հասարակայնության հետ կապերի վարչությունից հետաքրքրվեց՝ արդյոք խաչքարը բնօրինա՞կն է, եւ եթե այո՝ մշտակա՞ն է տեղափոխվել Իտալիա: Նույն վարչությունից Ալլա Սերոբյանը փոխանցեց ընդամենը հետեւյալը. «Հայ տպագրության 500-ամյակի միջոցառումների շրջանակում Բրասկի քաղաքի հրապարակում ցուցադրության նպատակով է խաչքարը տեղափոխվել Իտալիա ՝ ժամանակավոր արտահանման բոլոր անհրաժեշտ ձեւակերպոււմները կատարելուց հետո»:
Կարդացեք նաև
Ի դեպ, ժամանակին Լուվրում կազմակերպված «Սակրա Արմենիա» («Սուրբ Հայաստան») ցուցահանդեսը, որտեղ նույնպես ցուցադրվում էին Հայաստանի պատմության թանգարանից եւ Էջմիածնի Մայր տաճարից տարված եզակի ցուցանմուշներ, հայկական խաչքարեր, «վերադարձավ» Հայաստան՝ «Վերադարձի ցուցահանդեսով»: Հետաքրքիր է՝ նույնը կպատահի՞ միջնադարյան խաչքարի հետ, թե այն այլեւս Հռոմում խորհրդանշելու է հայ-իտալական բարեկամության հարատեւությունը, ինչպես նշվում է պաշտոնական աղբյուրներում:
Գոհար ՀԱԿՈԲՅԱՆ
