Արեւելյան մարտարվեստների վարպետ Շանգուան Պենֆեյը մահացել է ստացած ծանրագույն նոկաուտից՝ 42 օր հետո: Դա տեղի է ունեցել հոկտեմբերի վերջին` Չինաստանի Հայնան նահանգում անցկացված «Քունգ-ֆուի արքա» բաց առաջնության ժամանակ` մրցակցից ծոծրակին ստացած արգելված հարվածից հետո:
Մարտն ընթացել է դաժան պայքարում եւ մահով ավարտվել Պենֆեյի համար, որին ծանրագույն նոկաուտից հետո շտապ տեղափոխել են հիվանդանոց: Բժիշկները 42 օր պայքարել են վարպետի կյանքի համար, սակայն անզոր են եղել փրկել. Շանգուան Պենֆեյը մահացել է գլխուղեղի ծանր վնասվածքից: Այս մասին տեղեկացնում է «China Daily»-ն` ավելացնելով, որ ոմանք մեղադրում են մրցակցին, որը հարվածը հասցրել է ծոծրակին, ինչն արգելված է կանոններով, մյուսները տարակուսած են, թե բժիշկներն ինչպե՞ս են Պենֆեյին թույլատրել մասնակցել առաջնությանը, երբ դրա մեկնարկից մի քանի ամիս առաջ նա էլի նոկաուտի է ենթարկված եղել:
Աշոտ ՀԱԿՈԲՅԱՆ
