Սյունիքի մարզի Քաջարան գյուղի գյուղապետ Ռաֆիկ Աթայանը, որ երեկ «Առավոտի» հետ զրույցում հերքել էր լուրերը, թե իրեն տարել են ոստիկանություն՝ այսօր հաստատեց, որ ճնշումների արդյունքում ներկայացրել է հրաժարականի դիմում:
Ռաֆիկ Աթայանն ասաց, որ ճնշել են տեղի իշխանությունները (խոսքն ամենայն հավանականությամբ մարզպետարանի եւ մարզպետի մասին է):
Հիշեցնենք, որ Քաջարանում գործող Զանգեզուրի պղնձամոլիբդենային կոմբինատի ղեկավարությունը ճնշումներ է գործադրում բնակիչների վրա, նույնիսկ սպառնում է գյուղ իրավապահ մարմիններ ուղարկել, տեխնիկա ուղարկել աշխատելու, եթե բնակիչները չստորագրեն պայմանագրերը: Հիշեցնենք, որ կառավարության ապրիլի 28-ի 627-Ն որոշմամբ՝ Քաջարան գյուղի 181,7 հեկտար հողատարածքը, որի մեջ, ըստ գյուղապետի, նաեւ գյուղի գերեզմանն է, Զանգեզուրի պղնձամոլիբդենային կոմբինատին է հատկացվել հանքարդյունաբերական նպատակով՝ բաց հանքի ընդլայնման հեռանկարները հաշվի առնելով: Կառավարության այս որոշումից խիստ վրդովված 600 քաջարանցի մայիսի 31-ին դիմել էր ՀՀ նախագահ Սերժ Սարգսյանին, ԱԺ նախագահ Հովիկ Աբրահամյանին եւ վարչապետ Տիգրան Սարգսյանին, իսկ գյուղ մտած տեխնիկան էլ դուրս էին հանել տարածքից:
Այսօր գյուղն ունի մոտ 270 բնակիչ, կառավարությանն ուղղված նամակը ստորագրել են նաեւ գյուղից հեռացած քաջարանցիները: Քաջարան գյուղը հայտարարում է, որ այս որոշումը ամբողջ գյուղի ստիպողաբար տարհանում է նշանակում:
Կարդացեք նաև
Ռաֆիկ Աթայանը մեզ ասաց նաեւ, որ հրաժարականը ոչինչ չի նշանակում, ինքը շարունակելու է պայքարել, որ նշված որոշումը չեղյալ հայտարարվի:
Երկու օր հետո Ռաֆիկ Աթայանը դիմում է գրելու եւ հեռանալու է հանրապետական կուսակցությունից: Ասաց, եթե այս նեղ պահին կուսակցությունը իր կողքին չէ՝ էլ ինչ իմաստ ունի մնալ ՀՀԿ շարքերում:
Մերի ՍՈՂՈՄՈՆՅԱՆ
