Այսօր՝ դեկտեմբերի 15-ին, դժբախտ պատահար է տեղի ունեցել Գեղարքունիքի մարզում: Ինչպես դեպքի վայրից Aravot.am -ին հայտնում է ֆոտոլրագրող Գագիկ Շամշյանը՝ ժամը 13.30-ի սահմաններում, Գեղարքունիքի մարզի Գավառ քաղաքի Պետրովի 2-րդ նրբանցքի 14 բնակարանում շմոլ գազից թունավորման հետևանքով մահացել են 33-ամյա Գրիշա Շանոյանը, 21-ամյա Նաիրա Գևորգյանը և նրանց 1-ամյա դուստրը՝ Հռիփսիմե Շանոյանը:
Դեպքի վայրում հավաքվածները ֆոտոլրագրողին պատմել են, որ մահացածները ամուսիններ են և իրենց երեխան: Երեխան օրորոցում քնած է եղել, և մահացել է շմոլ գազից:
Այս պահին նշված բնակարան են ժամանել ոստիկանության Գավառի բաժնի օպերատիվ խումբը՝ Գավառի ոստիկանապետ Կարեն Նիկոլյանի գլխավորությամբ: Ժամանել են նաև դատական բժիշկն ու ոստիկանության քննչական գլխավոր վարչության Գեղարքունիքի մարզի քննչական բաժնի քննիչները՝ քննիչ Ալիկ Կարապետյանի գլխավորությամբ:
Փաստի առթիվ քննչական բաժնում նյութեր են նախապատրաստվում: Քննիչի կողմից նշանակվել են մի շարք փորձաքննություններ:
