Թուրքիան սպառնում է համարժեք պատասխան տալ Ֆրանսիային, եթե այդ երկրի խորհրդարանը հաջորդ շաբաթ նախատեսված քվեարկության ժամանակ հավանություն տա Հայոց ցեղասպանությունը ժխտելու համար պատիժ սահմանող օրինագծին։ Այդ մասին, «Անադոլու» գործակալության հաղորդմամբ, Թուրքիայի խորհրդարանում հայտարարել է արտգործնախարար Ահմեթ Դավութօղլուն։
«Կասկածից վեր է, որ մենք անպատասխան չենք թողնի որեւէ երկրի առաջնորդի, կառավարության կամ խորհրդարանի կողմից Թուրքիային ու թուրք ժողովրդին վիրավորելու փորձը», – հայտարարել է Դավութօղլուն։ Վերջինս նաեւ պնդել է, թե այդ օրինագծի ընդունմամբ Ֆրանսիան հակասում է իր իսկ սկզբունքներին` խոսքի ազատության վերաբերյալ, եւ «կրկին Եվրոպա է բերում միջնադարյան մտածելակերպը»։
«Ֆրանսիայի այս քայլը կարող է նոր դոգմա ստեղծել պատմության վերաբերյալ, որը ժխտում է այլընտրանքային կարծիքները։ Սա միջնադարին բնորոշ մտածելակերպ է, եւ դրան վերադառնալը վտանգավոր զարգացում է Եվրոպայի համար», – հայտարարել է Թուրքիայի արտգործնախարարը։
«Ազատություն» ռադիոկայան
