Այսօր կառավարության նիստից հետո լրագրողների հետ հանդիպման ժամանակ արդարադատության նախարար Հրայր Թովմասյանը հրաժարվեց մեկնաբանել Սյունիքի մարզպետի նկատմամբ քրեական գործի կարճման փաստը:
«Ես չեմ ուզում մտնել այլ մարմինների լիազորությունների մեջ: Հատուկ քննչական ծառայությունն է հարուցել, ինքն էլ որոշել է կարճել, գեղեցիկ չէ, որ նախարարը մեկնաբանի: Ես տեղյակ չեմ մանրամասներին: Եթե կողմերը համաձայնության են գալիս՝ քրեական գործը հնարավոր է կարճվի»:
Նախարարը շրջանցեց նաեւ օմբուդսմենի հայտարարությանը մեկնաբանելու հարցը: Մարդու իրավունքների պաշտպանը «Մարդու իրավունքների EXPO-ում» լրագրողների հետ զրույցի ընթացքում ասել էր. «Շատերին է հայտնի երեք դատավորների կարգապահական պատասխանատվության ենթարկելու իմ հրապարակային նախաձեռնությունը: Երեկ Արդարադատության նախարարն իր համերաշխությունը հայտնեց դատական իշխանության համապատասխան մարմնի հետ և ես ստացա վերջնական մերժում` բոլոր երեք գործերով: Սա 2011 թվականի իմ ամենամեծ հիասթափությունն է»: Հրայր Թովմասյանն այս առնչությամբ ասաց. «Ես չեմ հիասթափեցրել, շաբաթ օրը կասեմ»:
Արփինե ՍԻՄՈՆՅԱՆ
