Ավագ դպրոցներում ոստիկանի հաստիք ունենալու գաղափարն անցյալ տարի հարուցեց ծնողների, հոգեբանների եւ մի շարք մանկավարժների դժգոհությունը: Չնայած դրան, մայրաքաղաքի 11 դպրոցներում, իրականացվել է պիլոտային ծրագիր: Այդ դպրոցները մեկ տարի ոստիկան են ունեցել:
Երեկ Aravot.am-ի հետ զրույցում ոստիկանության քրեական հետախուզության գլխավոր վարչության երրորդ վարչության պետի տեղակալ Նելլի Դուրյանը վստահեցրեց, որ ոստիկան ունենալու փորձնական ծրագիրը հաջողություններ է արձանագրել, քանի որ աշակերտների մոտ ոստիկանի կերպարը դեպի դրական փոխվել է. «Բացի այդ, երեխաներն ավելի լավ են ծանոթացել իրենց իրավունքներին, իսկ ծրագրի ավարտից հետո տեղի ունեցած հարցումները ցույց են տվել, որ ծնողները նույնպես գոհ են»:
Նկատենք, որ այս հարցի շուրջ ընդդիմադիր ծնողները, հոգեբաններն ու մանկավարժները գտնում էին, որ ոստիկանի ներկայությունը ճնշելու է աշակերտներին, քանի որ մեր հասարակության մեջ ոստիկանը դեռ չի ընկալվում, որպես քաղաքացու շահերի պաշտպան, եւ քանի որ նրանց մեծ մասն ունի՝ «գործ սարքող, անարդար մարդկանց նկարագիր»: Կրթության պատասխանատուներն էլ պատճառաբանում էին, թե ավագ դպրոցներում հավաքվում են տարբեր կրթօջախներից եկած, տարբեր նախասիրությունների, հետաքրքրությունների, վարքի տեր պատանիներ եւ հնարավոր է պահանջվի ոստիկանի միջամտությունը՝ նրանց կարգի հրավիրելու համար:
Լուսինե ԲՈՒԴԱՂՅԱՆ
