Այսօր Հայաստանի պետական ֆիլհարմոնիկ նվագախմբի գեղարվեստական ղեկավար եւ գլխավոր դիրիժոր Էդուարդ Թոփչյանն ու նկարիչ, ռեժիսոր Սուքիաս Թորոսյանը «Արամ Խաչատրյան» համերգասրահում հանդիպեցին լրագրողների հետ:
Նրանք տեղեկացրին, որ դեկտեմբերի 21-ին եւ 25-ին, «Արամ Խաչատրյան» համերգասրահում ՀՊՖՆ-ն կհնչեցնի Չայկովսկու «Շչելկունչիկը»: Մինչ այդ, դեկտեմբերի 16-ին էլ Ֆիլհարմոնիկը կներկայացնի բրիտանացի անվանի կոմպոզիտոր Գ. Հոլոթի «Մոլորակներ» սյուիտը:
Այս առիթով Aravot.am-ին Էդ. Թոփչյանը փոխանցեց հետեւյալը. «Կատարմանը առանձնահատուկ շուք կփոխանցի Անդրանիկ Սուքիասյանի համակարգչային գրաֆիկան՝ ունկնդրին տեղափոխելով սյուիտում ներկայացվող 7 մոլորակները: Անկասկած, «տիեզերական» այս երաժշտության մեջ իր տեղն ու դերն ունի Սոնա Հովհաննիսյանի ղեկավարած «Հովեր» պետական կամերային երգչախումբը»:
Այս համերգի ռեժիսուրան դարձյալ Սուքիաս Թորոսյանինն է: Ֆիլհարմոնիկի նախաձեռնությամբ ու մասնակցությամբ նախկինում բեմադրված 9 օպերաներից 8-ի ռեժիսորը Ս. Թորոսյանն է:
Կարդացեք նաև
Սուքիաս Թորոսյանից հետաքրքրվեցինք՝ նրա արտերկրյա գործունեության մասին: «Բազմաթիվ հրավերներ եմ ունենում, ամենավերջինը 2010-ին էր. Բուլղարիայի ազգությամբ թուրք մշակույթի նախարարն առաջարկեց բեմադրել Պուչինիի «Մադամ Բաթերֆլայը» ինչից, հասկանալի պատճառով, հրաժարվեցի»,-պատասխանեց պարոն Թորոսյանը:
Սամվել ԴԱՆԻԵԼՅԱՆ
