ՀՀ ԱԺ-ում քննարկված նախագծի՝ կնոջ եւ տղամարդու հավասարության պետական երաշխիքների վերաբերյալ Aravot.am-ը զրուցեց ԱԺ պատգամավոր Անահիտ Բախշյանի հետ:
Պատասխանելով կինը «տե՞ր» է, թե՞ «հնազանդ» հարցին՝ Անահիտ Բախշյանն ասաց. «Ես քրիստոնյա մարդ եմ եւ հավատում եմ, որ Աստված իր պատկերով ստեղծեց Ադամին եւ նրան միայնակ չթողնելու, ինչպես նաեւ մարդկությունը շարունակելու համար` նաեւ Եվային: Ես նաեւ հավատում եմ, որ Աստված երկուսին էլ տվեց ազատ կամք` այս կյանքում աստվածահաճո ապրելու համար ընտրություն կատարելու` յուրաքանչյուրին օժտելով խիստ յուրահատուկ առաքելությամբ: Բոլոր այն սահմանափակումները, որոնք մարդկության ստեղծման օրվանից ուղեկցել են կանանց, դրանք տղամարդկանց կողմից ուժեղ ցեղ ներկայանալու մոլուցքի հետեւանք են»:
Պատգամավորի ձեւակերպմամբ՝ մարդկության պատմության մեջ այդ մոլուցքը որոշ դեպքերում արդարացրել է իրեն, որոշներում` ուղղվել հենց մարդկության դեմ. «Իմ խորին համոզմամբ, ցանկացած մարդ, կախված տվյալ պահին ընտանիքում, հասարակության մեջ, աշխատանքի վայրում իր ունեցած դերից, թե տեր պետք է լինի, թե հնազանդ` կախված յուրաքանչյուր անհատի պատասխանատվության աստիճանից: Ես ինքս որպես ամուսնուս համար կին, ընտանիքի մայր, տատիկ, ուսուցիչ եւ այսօր` պատգամավոր, բոլոր դերերում աշխատում եմ թե տեր լինել, թե հնազանդ: Միշտ չէ, որ հաջողվում է, բայց սա իմ համոզմունքն է, որը բխում է իմ Սահմանադրությունից»:
Եվա ՀԱԿՈԲՅԱՆ
