Ձայների ճնշող մեծամասնությամբ դեկտեմբերի 13-ի երեկոյան ԱՄՆ-ի Կոնգրեսի ներկայացուցիչների պալատը ընդունեց թիվ 306 բանաձևը:
Թուրքիայում կրոնական ազատություններին վերաբերող Կոնգրեսի բանաձևը կոչ է անում Թուրքիայի կառավարությանը երաշխավորել երկրի քրիստոնեական ժառանգությունը, ինչպես նաև վերադարձնել եկեղեցիներին պատկանող սեփականությունը:
Կալիֆորնիայից հանրապետական Էդ Ռոյսի և դեմոկրատ Հովարդ Բերմանի նախաձեռնությամբ բանաձևն այս տարվա հուլիսի 20-ին արդեն իսկ հավանության էր արժանացել Կոնգրեսի արտաքին հարաբերությունների հանձնաժողովում՝ ձայների 43 կողմ, 1 դեմ հարաբերակցությամբ:
Բանաձևը Կոնգրեսի լիագումար նիստին ներկայացվեց պալատի մեծամասնության ղեկավար Էրիկ Քանթորի կողմից, խորհրդարանական հատուկ արագացված քվեարկությանը, որի ընթացքում անհրաժեշտ է ԱՄՆ-ի օրենսդիրի ներկայացուցիչների առնվազն երկու երրորդի քվեարկությունը, այսինքն առնվազն 290 ձայն՝ բանաձևի հաստատման համար: Ի դեպ, այսօրինակ քվեարկություններ սովորաբար լինում են ոչ հակասական օրինագծերի վերաբերյալ:
Կարդացեք նաև
Բանաձևում հիշատակվում է Օսմանյան կայսրությունում բնակվող ավելի քան 2 միլիոն հայ, հույն, ասորի, սիրիակ և այլ քրիստոնյաների միտումնավոր ոչնչացման փաստը, ինչպես նաև այն, որ այսօրվա Թուրքիայում մնացած փոքրաթիվ քրիստոնյա համայնքերին պետք է համայնքային սեփականության տնօրինման իրավունք ընձեռել:
ԱՄՆ-ի Կոնգրեսի 306-րդ բանաձևը հետևյալ 4 կետերն է առանձնացնում՝ բոլոր տեսակի կրոնական խտրականությունները դադարեցումը. եկեղեցական կառույցներին առանց որևէ սահմանափակումների կրոնական ծեսեր, կրթական, սոցիալական և այլ ծառայությունների մատուցումն իրականացնելու թույլտվությունը. եկեղեցիների, դպրոցների, հիվանդանոցների, հուշարձանների, սրբավայրերի, ներառյալ շարժական սեփականությունն իրենց օրինական տերերին վերադարձնելը, ինչպես նաև համայնքներին նշված տարածքներում վերակառուցման և վերականգնողական աշխատանքներ առանց սահմանափակումների իրականացնել թույլատրելը:
Թե ինչպիսի ազդեցություն կունենա Ամերիկյան օրենսդիրի կողմից ընդունված՝ Թուրքիայի կառավարությանը պարտավորեցնող բանաձևը ցույց կտա ժամանակը, սակայն քվեարկության նախօրեին Վաշինգտոնի թուրքական լոբբիստական կազմակերպությունները փորձել էին կանխել ԱՄՆ-ի Կոնգրեսի կողմից բանաձևի ընդունումը:
Արսեն Խառատյան
Ամերիկայի Ձայն
