«Իմ ճակատը շատ նեղ էր, ու ես ինձ կոմպլեքսավորված էի զգում¦»,- պատմում է 18-ամյա ուսանողուհի Նարինեն: Ասում է՛ 2 ամիս առաջ փողոցում քայլում էր անվստահ, կաշկանդված, շրջապատում իրեն զգում էր ոչ լիարժեք մարդ. պատճառը ճակատի մազակալումն էր, անցանկալի մազերից ազատվելուց հետո, նրա խոսքով բավական բարձրացել է իր ինքնագնահատականը: «Ինձ համար դա անհրաժեշտություն էր, ոչ թե գլամուրային կամ նորաձև աղջիկ երևալու միջոց»,- ավելացնում է Նարինեն:
Հոգեբան Լիլիթ Մանուկյանի խոսքով` այսպիսի թերարժեքություն հիմնականում անցումային տարիքում գտնվող աղջիկներին է բնորոշ: 20-ամյա Արմինեի համար էլ, դեմքի մազերից ազատվելը զուտ ցանկություն էր, որը հեշտությամբ իրագործվեց: «Ես որևէ խնդիր չեմ ունեցել, բայց եթե կարող էի մի փոքր միջամտությամբ ավելի ընդգծել գեղեցկությունս, ինչո՞ւ չանեի որ»,- նշում է նա:
Բժիշկ-կոսմետոլոգ Մելանյա Վիրաբյանը նկատում է, վերջին ժամանակներս հայ կանանց մոտ կոսմետոլոգիական ծառայություններից օգտվելու միտումը գնալով մեծանում է: Նրա խոսքով` հայ կանանց մոտ մազակալման պատճառ կարող են դառնալ ոչ միայն հորմոնալ խանգարումները, այլև մեր երկրի բնակլիմայական պայմանները` օդի, ջրի աղտոտվածությունը:
Անցանկալի մազերից ազատվելը կարող է վտանգավոր լինել կամ բացասական ազդեցություն թողնել ինչպես մաշկի, այնպես էլ մարդու օրգանիզմի վրա, կոսմետոլոգը խորհուրդ է տալիս հեռու մնալ առանց մասնագետի օգնության որևէ քայլ անելուց` ավելացնելով, որ պետք չէ միանգանից գործի անցնել ու ձեռքի տակ եղած ցանկացած հավանական ու անհավանական միջոցով փորձել հեռացնել տհաճություն պատճառող մազերը. նախ պետք է դիմել բժշկի և պարզել դրանց առաջացման պատճառները:
Մ. Վիրաբյանի խոսքով, մազածածկույթից վերջնականապես ազատվելու ամենաարդյունավետ միջոցը ասեղային էպիլյացիան է, այն էլ այն դեպքում, երբ մազերը նուրբ են:
Կանանց, ովքեր ուզում են գեղեցիկ լինել, կոսմետոլոգը խորհուրդ տվեց չմոռանալ, որ մաշկը ոչ միայն արտաքին միջավայրից ստացած բացասական ազդակների, այլև ներաշխարհի ամենաակտիվ արձագանքողն է: «Կանայք առաջինը պետք է սիրեն իրենց. իրենց խնամքին ուղղված ցանկացած քայլ պետք է բխի իրենց անձը սիրելուց և ոչ թե դիմացինին զարմացնելուց»,- նշում է Մ. Վիրաբյանը` հավելելով, որ ինչպես կնոջ ներաշխարհն է ազդում նրա արտաքին տեսքի վրա, այնպես էլ արտաքինը կարող է ստեղծել հոգեկան վիճակ և տրամադրություն:
Ռուզան Ասատրյան
