Դեկտեմբերի 9-ին Վանաձորից «Առավոտը» ստացել էր մի նամակ, որը ստորագրել էր «Կարապ» ՍՊԸ տնօրեն Սամվել Հարությունյանը:
Նամակագիր-տնօրենը տեղեկացնում էր, որ դեկտեմբերի 9-ին Լոռու մարզի ընդհանուր իրավասության դատարանում տեղի էր ունենալու Լեռնապատ գյուղի բնակիչների մասնակցությամբ դատավարություն:
Լեռնապատի գյուղաբնակները, որոնք աշխատում են «Քարաբերդ» ՍՊԸ-ում, ներգրավված են որպես վկա: Ըստ տնօրենի, «Քարաբերդն» էլ պատկանում է ԱԺ նախկին փոխխոսնակ Արտաշես Թումանյանին. «Պայքար է ծավալվել իմ դեմ, որպեսզի ես Արտաշես Թումանյանի քարհանքի կողքին նոր քարհանք չբացեմ, եւ նա պահի իր մոնոպոլ դիրքը բազալտի քարի եւ ավազի շուկայում եւ աշխատաշուկայում»: Տնօրենի տեղեկացմամբ, Արտաշես Թումանյանը «հաջողացրել» է իր դեմ քրեական գործ «սարքել»: Սակայն մենք նամակն ամբողջությամբ չենք հրապարակի: Տարօրինակը նամակի «հրավերն» է լրատվամիջոցներին. «Եթե այն լրատվամիջոցը, որն անդրադարձել է Լեռնապատի խնդրին, իմ կանչով չի ներկայանա դատական նիստին եւ չի տա երեւույթի օբյեկտիվ գնահատականը մամուլում, կհաստատի, որ Լեռնապատի գյուղապետին անվանարկելու համար շարունակաբար տպագրվող հոդվածները պատահականության արդյունք չեն եւ պատվեր են եղել»:
ՌՈՒԶԱՆ ՄԻՆԱՍՅԱՆ
Կարդացեք նաև
«Առավոտ» օրաթերթ
