Լոռու մարզի ընդհանուր իրավասության դատարանը՝ դատավոր Նաիրա Ավետիսյանի նախագահությամբ, անցյալ ուրբաթ մերժեց Լեռնապատ համայնքի ղեկավար Վանո Եղիազարյանի հայցադիմումն ընդդեմ նույն գյուղի բնակիչ Կամսար Թամարյանի: Համայնքի ղեկավարը համագյուղացուն մեղադրում էր իր պատիվը, արժանապատվությունը եւ գործարար համբավը արատավորելու եւ իրեն զրպարտելու մեջ:
Դիմելով դատարան՝ Լեռնապատի համայնքապետը հայցադիմումում հայտնել էր, որ 2011թ. հունիսի 1-ին ՀՀ վարչապետին հասցեագրված դիմումի մեջ զետեղվել են պատասխանողի կողմից իր հասցեին արված հայտարարություններ, որոնք իրենցից զրպարտություններ են ներկայացնում:
Վանո Եղիազարյանը հայցադիմումում նշել էր, որ պատասխանողը ՀՀ վարչապետին հասցեագրված դիմումի մեջ իրեն հանցագործ է անվանել:
Մասնավորապես, համայնքի ղեկավարը մատնանշել էր հետեւյալ արտահայտությունները. «Իշխանությունների հովանավորությամբ գյուղապետը շարունակեց պաշտոնավարել, թաքցրեց ու վերացրեց իր շատ հանցանքների հետքերը, փոխել տվեց շատերի ցուցմունքը: Կեղծ մեղադրանքներով ու իբր զրպարտության համար դատական գործեր է հարուցել ընդդիմադիրների դեմ: Ինձ ընդհանրապես արգելում է անասուններին արոտ հանել ու տարածք չի հատկացնում: Ապօրինի կերպով փոխեց գյուղի հողերի կադաստրային կարգերը, հարկաչափերը, գազիֆիկացման համար կազմակերպեց ապօրինի դրամահավաք, թույլատրեց ապօրինի հանքօգտագործում» եւ այլ արտահայտություններ:
Կարդացեք նաև
Համայնքապետը պնդում է, որ վերոնշյալ արտահայտությունները չեն համապատասխանում իրականությանը:
Նա նշում է, որ թեեւ իր դեմ քրեական գործ է հարուցվել, սակայն իր նկատմամբ չկա դատարանի՝ օրինական ուժի մեջ վճիռ: Դա հիմք չէ՝ իրեն հանցագործ անվանելու համար: «ՀՀ Սահմանադրության 21 հոդվածի համաձայն՝ հանցագործության մեջ մեղադրվողը համարվում է անմեղ, քանի դեռ նրա մեղավորությունն ապացուցված չէ օրենքով սահմանված կարգով դատարանի օրինական ուժի մեջ մտած դատավճռով»,- բացատրում է նա:
Ըստ նրա՝ ՀՀ վարչապետին ուղղված դիմումը հրապարակային գրավոր խոսք է, քանի որ այն կարող է ստանալ ՀՀ ցանկացած քաղաքացի:
Դատարանի դիրքորոշմամբ, սակայն, պատասխանող Կամսար Թամարյանի կողմից ՀՀ վարչապետին ուղղված դիմումն իր մեջ հրապարակային հայտարարություններ չի պարունակում:
Դատարանը հանգեց նրան, որ հայցվոր Վանո Եղիազարյանի պատվին, արժանապատվությանը, գործարար համբավին հրապարակայնորեն վնաս չի հասցվել:
Պատասխանող Կամսար Թամարյանի փաստաբան Էդմոն Մարուքյանն ասում է, որ ի սկզբանե հայցադիմումն անհիմն էր:
«Կամսար Թամարյանը, օգտվելով իր սահմանադրական իրավունքից, գրավոր դիմում էր ներկայացրել ՀՀ վարչապետին: Դիմումի մեջ նա ներկայացրել էր Լեռնապատ համայնքի ղեկավարի գործունեության վերաբերյալ իր կարծիքը եւ համայնքի բնակիչների դժգոհությունները»,- բացատրում է փաստաբան Մարուքյանը:
Դատարանը որոշում կայացրեց որպես փաստաբանի խելամիտ վարձատրության գումար Լեռնապատի համայնքապետից բռնագանձել 80.000 ՀՀ դրամ գումար, պետական տուրքի համար էլ, դատարանի որոշմամբ, Վանո Եղիազարյանից բռնագանձվելու է 56. 000 ՀՀ դրամ:
ԱՆՈՒՇ ԲՈՒԼՂԱԴԱՐՅԱՆ
Վանաձոր
«Առավոտ» օրաթերթ
