Դեկտեմբերի 22-ին կշարունակվի Կենտրոն եւ Նորք-Մարաշ վարչական շրջանների ընդհանուր իրավասության դատարանում Մխիթար Պապոյանի նախագահությամբ Ստեփան Հովակիմյանի եւ Վահրամ Քերոբյանի նկատմամբ հարուցված քրեական գործի դատաքննությունը:
Նրանք մեղադրվում են «Մոսկվա» կինոթատրոնի 5 մլն 80 000 դրամ գողանալու համար:
Նախորդ դատական նիստում Ստեփան Հովակիմյանի փաստաբան Տիգրան Սաֆարյանը միջնորդել էր կատարել կինոթատրոնի գանձապահի ձեռագրի դատաձեռագրաբանական փորձաքննություն: Կինոթատրոնի ղեկավարությունը հայտնել էր, որ հունվարի 4-10-ը գանձապահի գրառումներն արվել են մեկ մարդու կողմից:
Գլխավոր հաշվապահ Նինա Ադոյանն ու գանձապահ Կարինե Միսակյանը դատարանում պնդեցին, որ բոլոր ստորագրություններն իրենց են պատկանում: Իսկ 7 օրերի գումարների ընդունման փաստաթղթում առկա է մի անձի ստորագրությունը: Ստացվում է, որ կինոթատրոնը չի իմանում, թե ի վերջո որքան է «գողացված» գումարի չափը:
Կարդացեք նաև
Դատավոր Պապոյանը պարտավորեցրեց կինոթատրոնին ներկայացնել այդ փաստաթղթերի բնօրինակները, որոնց հիման վրա էլ կնշանակվի դատաձեռագրաբանական փորձաքննություն:
Սեփ. լր.
«Առավոտ» օրաթերթ
