«Հայաստանցին վերջին 15 տարվա ընթացքում պաշտպանված չի եղել: Հայաստանի քաղաքացու իրավունքներն ամենուր ոտնահարվում են: Մեր կուսակցության հետ կապվածն էլ նույն մասնակի խնդիրն է: Իշխանական կուսակցությունները բարգավաճում են տարածքները, պետության, ժողովրդից գողացած գումարներով ավելացնում, իսկ ընդդիմադիր կուսակցություններին պետք է խեղդեն, նեղացնեն, որպեսզի իրենց ավելի լիաթոք զգան սանձարձակության մեջ»,- այսօր Aravot.am-ի հետ զրույցում ասաց «Ժողովրդավարական հայրենիք» կուսակցության ղեկավար Պետրոս Մակեյանը:
Կուսակցության ներկայացուցիչներն այսօր՝ Մարդու իրավունքների օրը, Երեւանում բողոքի երթ են կազմակերպել՝ Հայաստանում ՄԱԿ-ի եւ ԵԱՀԿ-ի գրասենյակների տարածքում: Այնուհետեւ, ինչպես արդեն տեղեկացրել ենք, Ազատության հրապարակում նրանք միացան ՀԱԿ-ի կազմակերպած բողոքի ակցիային:
«Մեր գրասենյակի տարածքի մի մասը՝ 240 մետր քառ. վերցրել են 2009 թվականին, հիմա շարունակում են մնացած 75 քառ. զավթելու գործընթացը: Իհարկե, մենք պայքարում ենք իրավական հարթության մեջ, բայց իրավական հարթությունն ուղղորդվում է Բաղրամյան 26-ից: Այդ պատճառով մեր հիմնական խնդիրն ՝է՝ փոխել Բաղրամյան 26-ում նախագահի աթոռը զբաղեցրած անձին՝ այսինքն Սերժ Սարգսյանին»,- ասաց Պ. Մակեյանը:
Լուսինե ԽԱՉԱՏՐՅԱՆ
