«Համերաշխություն» կուսակցության եւ նույնանուն շարժման Տավուշի մարզի համակարգող Դավիթ Սահակյանը ցնցված է այն որոշումից, որով կառավարությունը արաբ շեյխի պատկանող «ԷՅ ԸՆԴ ԷՄ ՌԵՅՐ» ընկերությանը, Կոտայքի մարզի Արտավազ գյուղում անհատույց եւ անժամկետ տրամադրլ է 148 հեկտար տարածք:
Սահակյանը 4 տղայի հայր է, որոնք ծնվել են զույգերով: 4 եւ 2 տարեկան զույգերի 37-ամյա հայրը եւ 27-ամյա մայրը` Նաիրան, գործազուրկ են, ընտանիքը գոյատեւում է ամսական 39 հազար 500 դրամ ընտանեկան նպաստով: Դավիթը դիմել է հայրենի Դիտավան գյուղի ավագանուն եւ համայնքի ղեկավարին ` անհատույց 1000 քառակուսի մետր տնամերձ հողամաս տրամադրելու խնդրանքով: Սակայն նրան պատասխանել են, թե կառավարության որոշմամբ հողամաս տրամադրվում է միայն աճուրդով: Դավիթը փորձել է օգտվել երիտասարդ ընտանիքներին տրամադրվող արտոնյալ հիպոթեքային վարկից, սակայն նրա եւ կնոջ տարիքների գումարը գերազանցում է 60-ը, ուստի ընտանիքը չի կարող օգտվել այդ ծրագրից: Եթե Դավիթը ամսական 64 հազար դրամից ավելի աշխատավարձով գործ ճարի, նրա ընտանիքի նպաստը «կկտրվի»:
Դավիթ Սահակյանը հանդիպել է աշխատանքի եւ սոցիալական հարցերի նախարար Արթուր Գրիգորյանին եւ նրան խնդրել, որպեսզի կառավարությունը բազմազավակ ընտանիքների համար արտոնություններ սահմանող օրենսդրական նախաձեռնությամբ հանդես գա: «Իմ 4 տղաները անտուն մեծանալով պիտի գան բանակ եւ պաշտպանեն արաբ շեյխի ունեցվածքը»,- վրդովված ասել է Դավիթ Սահակյանը: Հիմա նրա ընտանիքն ապրում է Տավուշի մարզկենտրոն Իջեւան քաղաքում՝ հարազատներից մեկի տանը:
Կարդացեք նաև
Ոսկան ՍԱՐԳՍՅԱՆ
