Ձեր լրատվամիջոցի էլեկտրոնային կայքում տեղադրված «Հնարավո՞ր է, որ ՀՀԿ-ն ու ԲՀԿ-ն ընտրությունների գնան միասնական ցուցակով» հոդվածում (8 դեկտեմբերի, 2011, ժ. 21.49) նշվում է. «Բանն այն է, որ ինչպես տեղեկացնում են Կոնգրեսին մոտ կանգնած մեր աղբյուրները, ՀԱԿ–ն ու ԲՀԿ–ն իսկապես հեռակա շփումներ են ունեցել, բայց ինչպես ակնարկում էր ՀԱԿ առաջնորդ Լեւոն Տեր–Պետրոսյանը նոյեմբերի 25-ի հանրահավաքում ունեցած իր ելույթում, ՀԱԿ–ԲՀԿ համագործակցության համատեքստում միասնական ցուցակով ԱԺ ընտրություններին մասնակցելու հարց չի էլ ենթադրվել: Խնդիրը դիտարկվել է միանգամայն այլ հարթությունում. քաղաքական երկու ուժերն էլ ընտրությունների են գնում առանձին–առանձին, իսկ քվեարկությունից 3 օր առաջ՝ վերջին պահին, նրանց առաջնորդները հայտարարում են խորհրդարանում կոալիցիա կազմելու իրենց որոշման մասին»:
Հարկ ենք համարում հայտարարել, որ տվյալ տեղեկատվությունը կեղծ է: Նաև ցավով արձանագրում ենք, որ Ձեր լրատվամիջոցը հերթական անգամ տպագրում է իրականության հետ աղերս չունեցող «տեղեկատվություն»: Խորհուրդ ենք տալիս նման դեպքերում տեղեկատվությունը նախապես ճշտել կամ մեկնաբանություն ստանալ Հայ Ազգային Կոնգրեսի լիազոր ներկայացուցիչներից»:
