Այսօր Երեւանի ավագանին արտահերթ նիստ էր հրավիրել՝ աղբի գինը սահմանելու, Չինաստանից որպես նվեր ներկրվող ավտոբուսների համար կազմակերպություն ստեղծելու եւ բնակարաններ շնորհելու նպատակով:
Մինչեւ հունվարի 1-ը ավագանին պետք է որոշի, թե մայրաքաղաքի յուրաքանչյուր բնակիչ մեկ ամսվա աղբի համար որքան գումար պետք է մուծի:
Երեւանի նորանշանակ քաղաքապետ Տարոն Մարգարյանի գլխավորությամբ
ավագանին ամսական 200 դրամ աղբի վարձ հաստատեց: 2500 դրամ էլ կվճարեն նրանք, որոնք խոշոր եզրաչափի աղբ կնետեն, բայց այդ աղբը չպետք է գերազանցի 1 խմ-ն, հակառակ դեպքում՝ պետք է վճարել կրկնակի:
Կարդացեք նաև
Ավագանու որոշմամբ ստեղծված «Երեւանի ավտոբուս» ՓԲԸ-ն էլ կզբաղվի նվեր ավտոբուսները տնօրինելով: Ըստ ընկերության կանոնակարգի, այդ ավտոբուսները պետք է ուղեւորափոխադրումներ անեն արդեն իսկ սահմանված երթուղային ցանցով եւ չվացուցակներով, բայց նաեւ կարող են վարձակալության տրվել: «Երեւանի ավտոբուսի» նախնական բյուջեն հաստատվեց 1 միլիոն դրամ:
Այսօր համայնքի սեփականություն հանդիսացող մի շարք բնակարաններ էլ՝ Օտյան, Մարգարյան, Չեխովի փողոցներում եւ Դավիթաշեն համայնքում, ավագանու որոշմամբ հատուցվեցին այդ բնակարաններում բնակվող քաղաքացիներին:
Անուշ ԽԵՉՈՅԱՆ
