ՀՀԿ խորհրդարանական խմբակցության ղեկավար Գալուստ Սահակյանը երեկ անդրադառնալով ԱԺ առաջիկա ընտրություններին ՀՀԿ-ի եւ ԲՀԿ-ի միասնական համամասնական ցուցակով մասնակցելու հավանականությանն ու դրա շուրջ հնարավոր բանակցություններին՝ շատ կարճ ասաց. «Մի հավատացեք մամուլին»:
Բա որ եղա՞վ, բա որ դա իրականություն դարձա՞վ: Լրագրողի այս հարցադրումներին ի պատասխան պատգամավորը հավելեց. «Իրականության մասին կարելի է խոսել այն ժամանակ, երբ քաղաքական դաշտի ընտրությունների մասնակից բոլոր դերակատարները լինեն, նաեւ՝ առաջադրումների ժամանակ ու դրանից մի փոքր շուտ, երբ կազմավորվում են դաշինքներ եւ այլ տիպի միավորումներ: Այս պահին դեռեւս ուժի մեջ է փետրվարի 17-ի կոալիցիոն արձանագրությունը, ըստ որի, ընտրություններին համաձայնեցված պիտի մասնակցենք»:
Ճշգրտող հարցին՝ այսինքն, առանձին-առանձի՞ն, Գալուստ Սահակյանն արձագանքեց. «Այս պահին դա է՝ համաձայնագիրը, որը ստորագրել ենք»: Իսկ եթե, այնուամենայնիվ, ՀՀԿ-ԲՀԿ դաշինքը կայանա ՕԵԿ-ն այդ դաշինքում կլինի՞: «Ես կարծում եմ` այդ դաշինքը կա, մնում է ձեւը որոշել՝ որպես ռազմավարություն: Բնական է՝ այս պահին համագործակցում ենք եւ համագործակցելու ենք նաեւ առաջիկա ընտրություններում, մնացածը՝ առանձին-առանձի՞ն կգնանք, թե՞ մի ցուցակով՝ ընդամենը համագործակցության ձեւն է, որը պիտի նայվի այդ ժամանակահատվածի պահանջը հաշվի առնելով»,- եզրափակեց ՀՀԿ խմբակցության ղեկավարը:
