Օրեր առաջ Գյումրիում մանկապղծության հերթական դեպքն է արձանագրվել։ Մեզ հասած տեղեկություններով՝ 10-ամյա մի աղջնակի են բռնաբարել։
Դեպքից ժամեր անց հաջողվել է բացահայտել սեռագարին. նա 25-ամյա Վարդան Ղ.–ն է՝ նույնպես Գյումրիի քաղաքացի։ Երեկ մեզ հաջողվեց որոշ մանրամասներ պարզել ղեպքի վերաբերյալ։ Երեխային չվնասելու համար չենք նշում նրա անուն-ազգանունն ու այլ տվյալներ։ Միայն ավելացնենք, որ սովորում է 3–րդ դասարանում։ Ինչպես պատմեցին մեր աղբյուրները, աղջնակը 25-ամյա այլասերվածի ուշադրության կենտրոնում է հայտնվել դեռեւս շաբաթներ առաջ։ Վերջինս նպատակադրված ծանոթացել է երեխայի հետ ու սկսել մտերմանալ այնքան, որ լիովին վստահություն ձեռք բերի։ Եվ ահա նրան «տեղ է հրավիրել»։ «Տեղ» կոչվածն էլ մի կիսակառույց շինություն է եղել, որտեղ էլ 25-ամյա սեռագարը տրվել է անասնական բնազդներին։ Դեպքի վերաբերյալ փորձեցինք այլ մանրամասներ ստանալ ՀՀ ոստիկանությունից։ Լրատվական ծառայությունից միայն հայտնեցին, որ նման դեպք գրանցվել է դեկտեմբերի 5-ին, Վարդան Ղ.-ն էլ կալանավորված է։ Նշենք, որ թերեւս երիտասարդն այն առաջիններից է լինելու, որին սպառնում է ամլացման վտանգը։ Հիշեցնենք, որ անցած շաբաթ կառավարությունը հավանություն է տվել պատգամավոր Վիկտոր Դալլաքյանի օրենսդրական նախաձեռնությանը՝ մանկապիղծների նկատմամբ, որպես պատիժ, կիրառել ամլացումը։ Այսինքն՝ մանկապիղծը պետք է կրի իր պատիժը, իսկ ազատվելուց առաջ հատուկ փորձաքննություն անցնի։ Եթե փորձագետները եզրակացնեն, որ նա վտանգ է ներկայացնում հանրության համար, ապա կալանավայրից դուրս գալուց հետո պետք է կամ հարկադիր բուժում անցնի, կամ ամլացվի։ Իսկ ամլացմանը համաձայնելու դեպքում հիվանդին քիմիական եղանակով հորմոններ կներարկվեն, ինչը կնվազեցնի սեռական հակումը։ Նշենք, որ հարկադիր ամլացում կիրառվում է Լեհաստանում եւ ԱՄՆ-ում, իսկ կամավորը տարածված է Եվրոպայի մյուս երկրներում։
Գայանե Սարիբեկյան
«Հրապարակ»
