Իրավապաշտպան Իրինա Յասինա
Իրավապաշտպան Իրինա Յասինան եւ ճանաչված լրագրող Սվետլանա Սորոկինան հայտարարել են իրենց որոշման մասին՝ դուրս գալ ՌԴ նախագահին կից Քաղաքացիական հասարակության զարգացման եւ մարդու իրավունքների գծով խորհրդի կազմից: Համատեղ հայտարարությունը նրանք հրապարակել են իրենց բլոգներում այսօր՝ դեկտեմբերի 8-ին:
Խորհրդից դուրս գալու պատճառ որպես նրանք նշել են «Պետդումայի ընտրությունների արդյունքների կեղծումը եւ բողոքի հանրահավաքների մասնակիցների հանդեպ բիրտ բռնությունը»: «Մեդվեդեւին կից Խորհրդում աշխատանքային երեք տարիները մեզ համոզեցին այն բանում, որ Ռուսաստանի քաղաքացիների իրավունքների եւ ազատությունների հանդեպ հարգանքը ՌԴ նախագահի եւ նրա թիմի համար առաջնահերթություն չեն»,-ասված է հայտարարության մեջ:
Իրինա Յասինան 2004 թվականին ստեղծված այդ խորհրդին անդամակցում էր 2008-ից, իսկ Սվետլանա Սորոկինան՝ 2009-ից:
Լրագրող Սվետլանա Սորոկինան
Ռուսաստանում կայացած պառլամենտական ընտրությունների կեղծման դեմ բացահայտորեն հանդես են գալիս ռուսաստանյան քաղաքացիական հաստատությունների բազմաթիվ ներկայացուցիչներ, ինչպես նաեւ ընդդիմադիր կուսակցությունների եւ շարժումների ներկայացուցիչներ: Նրանց մասնակցությամբ հանրահավաքները, որոնք տեղի են ունեցել Մոսկվայում եւ Սանկտ-Պետերբուրգում դեկտեմբերի 5,6,7-ին, ավարտվել են զանգվածային ձերբակալություններով:
Նախորդ օրը նույն՝ ՌԴ նախագահին կից Քաղաքացիական հասարակության զարգացման եւ մարդու իրավունքների գծով խորհրդի նախագահ Միխայիլ Ֆեդոտինն ասել էր, որ կատարվածը «ծայրահեղ անհանգստության տեղիք է տալիս»:
