Ի պատասխան «Առավոտի» հարցադրման, ՀՀ ոստիկանության լրատվական ծառայությունից հաստատեցին շրջանառվող տեղեկությունները, թե փոխվել է նոյեմբերի 17-ին թմրանյութ օգտագործելու եւ պահելու կասկածանքով կալանավորված Մասիսի քաղաքապետարանի աշխատակից Արթուր Ղազարյանի խափանման միջոցը, եւ նա դեկտեմբերի 7-ին ստորագրությամբ ազատ է արձակվել: Ոստիկանության ներկայացուցիչը, սակայն, պաշտոնապես հերքեց կայքերում հրապարակված տեղեկությունները, թե ազատ են արձակվել նաեւ թմրանյութերի ապօրինի շրջանառության համար կալանավորված «Արարատցեմենտ» գործարանի առաքիչ «Շլամ» մականունով Արմեն Մուրադյանը, նաեւ Ասատուր Առուստամյանն ու նոյեմբերի 28-ին կալանավորված ԲՀԿ Ջերմուկի տարածքային կառույցի ղեկավար Արմեն Հովհաննիսյանը:
ԲՀԿ նախագահ Գագիկ Ծառուկյանի մամուլի խոսնակ Խաչիկ Գալստյանը տեղյակ չէր, թե արդյոք կալանավորվածներն ազատ են արձակվել: Նա հստակ տեղեկություն ուներ միայն Արթուր Ղազարյանին ազատ արձակելու մասին, մյուսների վերաբերյալ տեղեկություններին ծանոթ էր այնքանով՝ որքանով. կայքերի հաղորդագրություններից: Նույնը պնդեց նաեւ ԲՀԿ-ական պատգամավոր Վարդան Բոստանջյանը:
Հիշեցնենք, որ բոլոր չորս կալանավորվածներն էլ ուղղակի կամ անուղղակի կերպով առնչություններ ունեն ԲՀԿ-ի կամ նրա առաջնորդ Գագիկ Ծառուկյանի հետ:
