Այսօր aravot.am-ը ԲՀԿ Շիրակի մարզային կառույցի ղեկավար, ԱԺ-ի ամենաերիտասարդ պատգամավոր Մարտուն Գրիգորյանից հետաքրքվեց, թե ինչպե՞ս է վերաբերում քաղաքային իշխանությունների կողմից իր գերդաստանի հասցեին հնչեցվող այն քննադատություններին, որ ցանկասիրություն սերմանող «գիշերային քլաբներ» հիմնելով` փչացնում են ավանդական Գյումրին: Նշենք, որ Գյումրիում գործող 3 գիշերային ակումբներից մեկը, որն, ի դեպ, գերեզմանոց տանող ճանապարհին է, պատկանում է ԱԺ պատգամավորի հորեղբորորդուն, «ՀայՌուսգազարդի» Գյումրու գրասենյակի փոխտնօրեն Ռուստամ Գրիգորյանին: «Կոնկրետ ես բացարձակապես կապ չունեմ քլաբների հետ, այն հիմնել է իմ հորեղբոր որդին, նա էլ աշխատող, ստեղծող գործարար է, ու առհասարակ իմ բոլոր ազգականները գործարար մարդիկ են, որոնք իրենց հացը վաստակում են քրտինքով, ոչ ուրիշին թալանելու հաշվին: Իսկ քլաբներ, դիսկոտեկներ, մանկական աշխարհներ հիմնելը, իմ կարծիքով, օրինաչափ է, բնական է, ո՞վ է ասել, որ մեր քաղաքը նմանատիպ ժամանցի վայրերից պետք է զուրկ լինի, ո՞վ է ասել , որ գյումրեցին արժանի չէ Ուկրանիայից եկած պրոֆեսիոնալ մերկապարուհիների արվեստը դիտելու»,-ասում է պատգամավորը` տեղեկացնելով, որ այդ բիզնեսը Գյումրիում ստեղծվել է ռուս զինծառայողների պահանջարկով, հաճախորդների մեծ մասը հենց նրանք են: Ըստ պատգամավորի, նույն ռուսների առաջարկով ու պահանջարկով իր ազգականներից մեկը Գյումրիում շուտով կբացի նաև դիսկո-կարաոկե ակումբ. «Ես գիտեմ, որ նորից են քննադատելու, բայց եթե մարդը ունի այդպիսի վայրեր հաճախելու պահանջարկ, ապա կգնա ու կհասնի Երևան: Բայց լավ չէ՞ Գյումրիում բացենք, աշխատատեղեր ստեղծենք, հարկային վճարներն էլ Գյումրիում կատարվեն, այլապես ինչո՞ւ ենք պայքարում, որ մեկը գա ու Գյումրիում մի բան անի, աշխատատեղեր ստեղծի»:
Մանրամասները՝ «Առավոտ» օրաթերթի վաղվա համարում:
Նունե ԱՐԵՎՇԱՏՅԱՆ
