Ֆրանսիայի Ազգային ժողովի սահմանադրական օրենքների, օրենսդրության եւ հանրապետության ընդհանուր կառավարման հարցերով հանձնաժողովն ընդունել է Վալերի Բուայեի եւ նրա գործընկերների ներկայացրած օրինագիծը, որը պատիժ է սահմանում Հայոց ցեղասպանության ուրացման համար:
Ինչպես հաղորդում է Ֆրանսիայի ԱԺ պաշտոնական կայքը, հանձնաժողովի կողմից մշակված տեքստը նախատեսում է պատիժ սահմանել օրենքով ընդունված ցեղասպանությունները կասկածի տակ դնողներին: Ըստ այդմ, մեկ տարվա ազատազրկում եւ 45 հազար եվրո տուգանք կկիրառվի այն անձանց նկատմամբ, ովքեր կասկածի տակ կդնեն Հայոց ցեղասպանության փաստը, որը Ֆրանսիան օրենքի մակարդակով ընդունել է 2001-ի հունվարի 29-ին:
Հիշեցնենք, որ հոկտեմբերին Հայաստան կատարած այցի ժամանակ Ֆրանսիայի նախագահ Նիկոլա Սարկոզին ընդգծել էր Թուրքիայի կողմից Հայոց ցեղասպանության ճանաչման կարևորությունը: Նա նախազգուշացրել էր, որ ֆրանսիական պետությունում կարող է ընդունվել օրենք, ըստ որի այդ իրադարձությունների հերքումը կհամարվի հանցագործություն:
«Արմինֆո»
