Արդեն մի քանի օր է, ինչ խոսվում է արդարադատության նախարարության «Դատապարտյալների հիվանդանոց» քրեակատարողական հիմնարկը վաճառելու մասին: Արդարադատության նախարարության քրեակատարողական հիմնարկների վարչության մամուլի պատասխանատու Գոռ Ղլեչյանը մեր հարցերի պատասխանը գտնելու համար խորհուրդ տվեց ծանոթանալ կառավարության այս տարվա 831/Ն որոշմանը:
Ըստ այդ որոշման, «Դատապարտյալների հիվանդանոց» քրեակատարողական հիմնարկի զբաղեցրած` Երեւանի Արշակունյաց-2 հասցեում գտնվող`6355 քառ. մետր ընդհանուր մակերեսով համալիրն ու 1.7 հեկտար ընդհանուր մակերեսով հողատարածքը` գնահատվել է ոչ պակաս, քան 5,600, 000.0 հազ. դրամ գումար: Կառավարությունը հանձնարարել է, որ գնորդի հետ կնքելով պայմանագիր՝ գույքի հանձնման եւ վճարման ժամանակացույցի վերաբերյալ, պարտադիր պայման սահմանվի, այն է՝ Հայաստանի Հանրապետության արդարադատության նախարարությունը տարածքն ազատելու է ոչ շուտ, քան 2014 թվականի 2-րդ կիսամյակում, իսկ գնորդն օտարվող գույքի արժեքից 3,000,000.0 հազ. դրամը վճարելու է ոչ ուշ, քան 2013 թվականի 1-ին եռամսյակում:
Գնորդը, պարզվեց, Հայաստանի Հանրապետության առողջապահության նախարարության Բ. Ֆանարջյան-76 հասցեում գտնվող` «Ուռուցքաբանության ազգային կենտրոն» ՓԲԸ-ն է:
Արդարադատության նախարարության քրեակատարողական վարչության շենքը, որը գտնվում է Երեւան քաղաքի Արշակունյաց 63 հասցեում, տեղափոխվելու է Հալաբյան 41 ա՝ ներկայումս արդարադատության նախարարության շենքը: 0.6187 հեկտար ընդհանուր մակերեսով հողատարածքն ու 2000 քառ. մետր ընդհանուր մակերեսով վարչական շենքի մեկնարկային գինը սահմանվել է ոչ պակաս, քան 2,600,000.0 հազ. դրամ: Վարչությունը՝ նրա պետ Հայկ Հարությունյանի գլխավորությամբ, տարածքն ազատելու է ոչ շուտ, քան 2015 թվականի 1-ին եռամսյակում, իսկ գնորդն օտարվող գույքի արժեքն ամբողջությամբ վճարելու է ոչ ուշ, քան 2014 թվականի 2-րդ եռամսյակում: Գնորդի մասին խոսք չկա, սակայն ասվում է, որ գնորդը լինելու է «Գրանտ Քենդին»;
Կարդացեք նաև
Ռուզան ՄԻՆԱՍՅԱՆ
