6 ամիս է, ինչ Հայաստանի ազգային գրադարանը նոր տնօրեն ունի՝ ի դեմս Տիգրան Զարգարյանի: «Առավոտի» հետ զրույցում պարոն Զարգարյանն ասաց, որ գրադարանը լրջորեն նախապատրաստվում է 2012 թվականին. Հայկական տպագրության 500-ամյակն է նշվելու, ինչպես նաեւ Երեւանը գրքի համաշխարհային մայրաքաղաք է հռչակվել:
Ցավոք, գրատպության դարավոր ավանդույթներ ունեցող երկրի գլխավոր գրադարանի տարածքում գրքի հետ կապ չունեցող հաստատություններ են տեղակայված, որոնցից ձերբազատվելու արդյունքում դատական գործընթաց է սկսվել: «Թամանյանական մասնաշենքում դժբախտաբար առաջին հարկը պետգույքի կառավարման վարչությունը տվել էր տարբեր կազմակերպությունների՝ կարաոկե-բար, «Հալեպ» խանութ, բոդիբիլդինգի ֆեդերացիա, նաեւ կենտրոնական մասն էր տրված: Հիմա բոլորին դուրս հանելու համար դատական գործընթաց է սկսվել: Կարաոկեն արդեն բանալիները մեզ է վերադարձրել, «Հալեպը» մինչեւ տարվա վերջ դուրս կգա: Ինչ վերաբերում է Բոդիբիլդինգի ֆեդերացիային, դիմել ենք պետգույքի կառավարման վարչությանը, որպեսզի գրեն՝ դուրս գան»,-հայտնեց գրադարանի տնօրենը: Մեր այն տեղեկությանը, թե ժամանակին նաեւ հրաձգարան էին ուզում հիմնել ազգային գրադարանի տարածքում, պարոն Զարգարյանը ցավով հավելեց. «Ամեն ինչ էլ ցանկացել են.»: Նա նաեւ շեշտեց, որ հարցը հանրապետության նախագահի, մշակույթի նախարարի ուշադրության կենտրոնում է: «Այս պահին ամեն ինչ խաղաղ է, բայց եթե ինչ-ինչ խնդիրներ ունենանք, անպայման կդիմենք մամուլին»,-ասաց Տիգրան Զարգարյանը, որն այժմ կենտրոնացած է մասնավորապես Թամանյանական մասնաշենքը հիմնանորոգելու եւ գրադարանային նպատակներով տնօրինելու վրա:
Գոհար ՀԱԿՈԲՅԱՆ
Մանրամասները՝ տպագիր «Առավոտում»
