Հայ ազգային կոնգրեսի ընտրազանգվածի մասով մի մեծ շերտ հիմա քողարկված համակրություն ունի «Բարգավաճ Հայաստան» կուսակցության նկատմամբ: Եվ Լեւոն Տեր -Պետրոսյանը ԲՀԿ-ին միանալու հայտարարությամբ ցանկություն ուներ այդ կուսակցությանը զրկել մանեւրելու հնարավորությունից: Այս մասին այսօր Aravot.am-ի հետ զրույցում նշեց քաղաքագետ եւ բլոգեր Սուրեն Սուրենյանցը: Նա խորին համոզմունք հայտնեց, որ ԲՀԿ-ն եւ ՀԱԿ-ը չեն համագործակցի եւ չեն միավորվի. «Այդ երեւույթը, ցավոք սրտի կամ բարեբախտաբար, կա, բայց, բնականաբար, ԲՀԿ-ն հակառակորդ է, ինչպես Հանրապետական կուսակցությանը, այնպես էլ ՀԱԿ-ին: Ուղղակի ԲՀԿ-ն այսօր կարեւոր դերակատարություն ունի քաղաքական դաշտում ու բնականաբար չի ուզի խորհրդարանում լինել միայն ՀՀԿ-ի կցորդ»:
Մեր այն հարցին, թե ինչու է ինքը, լինելով ՀԱԿ նախկին անդամ, պարբերաբար իշխանությանների հասցեին հաճոյախոսություններ անում, այդպես ցանկանում է որեւէ պաշտո՞ն ստանձնել եւ վերադառնալ քաղաքականություն, պրն Սուրենյանցը պատասխանեց. «Ես ասում եմ, որ ՀՀԿ-ի թարմացմանն ու սերնդափոխությանն ուղղված քայլերն են դրական, դա եւ կոմսոմոլական միտում է, եւ դրական: Ցանկություն ունեմ, որ այդ դրական միտումը շատ լինի, որովհետեւ, այնուամենայնիվ, իշխող կուսակցության մասին է խոսքը, եւ ինչքան իշխող կուսակցությունը լավը լինի, այնքան իշխանության որակը լավը կլինի»: Ինչ վերաբերում է որեւէ պաշտոն ստանձնելուն, ապա, ըստ նրա, եթե պաշտոնի գնալու լիներ, վաղուց կգնար. «Որովհետեւ օրումեջ նման առաջարկներ ստանում եմ»: Իսկ թե ում կողմից եւ ինչ պաշտոններ են իրեն առաջարկվում, նա չասաց. «Կոռեկտ չէ այդ մասին խոսելը»:
Անուշ ԽԵՉՈՅԱՆ
Կարդացեք նաև
