ՀՀ նորանշանակ ոստիկանապետ Վովա Գասպարյանը ոչ միայն պաշտոնյաների տեղափոխություններ է սկսել Շիրակի մարզի ոստիկանության տարբեր բաժանմունքներում, այլ թոշակի է ճանապարհել մի քանի հին ու փորձառու պաշտոնյաների: Նրա կադրային քաղաքականության արդյունքում, այսօր փակ են Գյումրու ոստիկանության բոլոր պաշտոնյաների դռները. Գյումրին դեռեւս ոստիկանապետ չունի՝ փնտրտուքների մեջ են: 3 օր առաջ էլ աշխատանքից ազատել են նաեւ Գյումրու ոստիկանապետի 2 տեղակալներին` օպերատիվ գծով փոխոստիկանապետ Հակոբ Ղևոնդյանին, քրեական բաժանմունքի պետ Վաղարշակ Ճղրիկյանին: Ծառայությունների գծով տեղակալ Համլետ Կիրակոսյանին էլ տեղափոխել են մարզային վարչություն`փաստորեն մեկ աստիճանով բարձրացնելով նրա պաշտոնը:
Ոստիկանական մեր աղբյուրների բնութագրելով, աշխատանքից ազատված պաշտոնյաները ամենևին էլ թոշակային տարիքի չէին՝ նրանք դեռ 2-4 տարի ունեին աշխատելու: Մեր աղբյուրները Վովա Գասպարյանին, համարելով «Վանո 2», նշում են, որ նա սկսել է աշխատանքից ազատել այնպիսի մարդկանց, որոնց կարիքը դեռևս կա այս համակարգում: Այս առումով առանձնացնում են Գյումրու օպերատիվ գծով փոխոստիկանապետ Հակոբ Ղևոնդյանին, որը ժամանակին եղել է մարզի քրեական հետախուզության բաժանմունքի պետը և կարողացել է բացահայտել մի քանի աղմկոտ սպանություններ:
Նունե ԱՐԵՎՇԱՏՅԱՆ
