Ամասիայի կարի գործարանը, որը կառուցվել է հայ-գերմանական «ՎԿՍ Արմենիա» ընկերության եւ մայրաքաղաքում բնակվող հարուստ ամասիացիների՝ մասնավորապես ՊԵԿ նախագահ Գագիկ Խաչատրյանի միջոցներով, կռվախնձոր է դարձել: Ըստ որոշ տեղեկությունների, այս գործարանում, հակառակ ոմանց կամքի, «փայատեր» է դարձել Սերժ Սարգսյանի եղբայրը` Սաշիկ Սարգսյանը: Չնայած՝ այսօր Aravot.am-ի հետ զրույցում գործարանի սեփականատեր, սփյուռքահայ գործարար Քրիստիան Գերեջին հերքեց այդ լուրը՝ ասելով, որ ոչ լսել է, ոչ էլ նման բան կա, քանի որ ինքն «այդ մարդու հետ ժողով չի արել», եւ որ միակ փայատերն ինքն է:
Ինչ վերաբերում է գործարանի աշխատակիցների աշխատավարձերը ուշացնելուն, ապա Քրիստիան Գերեջին հավաստիացրեց. «Ես միայն ձեզ կարամ ասեմ եւ փաստեմ, որ իմ սոցվճարներն ու ուղարկած աշխատավարձերը բոլորն օրենքով եւ բանկի միջոցով է՝ կանխիկ փող չկա մեր սիստեմայի մեջ` գերմանական սիստեմն է` ես բաց եմ, կարամ ձեզ բաց հաշիվով ցույց տամ, որ ըսենց բան չկա: Մեզ մոտ աշխատանքի ընդունվելիս սկզբում վճարում են նվազագույն աշխատավարձի չափով, այնուհետեւ դառնում է գործարքային: Ինչքան շատ արտադրեն, այնքան շատ էլ կստանան»:
Նունե ԱՐԵՎՇԱՏՅԱՆ
Մանրամասները կարդացեք տպագիր «Առավոտի» վաղվա համարում:
