Ձվի շուկայում արհեստական դեֆիցիտ ստեղծելու համար նախորդ տարի «Լուսակերտի թռչնաբուծական» ֆաբրիկան տնտեսական մրցակցության պաշտպանության պետական հանձնաժողովի (ՏՄՊՊՀ) կողմից տուգանվել էր 5 միլիոն դրամ, գերիշխող դիրքի չարաշահման համար էլ՝ 100 միլիոն դրամ: Ֆաբրիկան ՏՄՊՊՀ-ի որոշումը բողոքարկել էր դատարանում:
Այսօր Aravot.am-ի հետ զրույցում ֆաբրիկայի նախկին տնօրեն Մանասե Եփրեմյանն ասաց, որ ՏՄՊՊՀ-ի որոշումը եղել է «պրիմիտիվ եւ մինչ օրս հանձնաժողովը չի կարողացել ապացուցել, որ 100 դրամով վաճառված ձվերը հենց «Լուսակերտի թռչնաբուծական» ֆաբրիկայի արտադրանքն են եղել»:
Մեր այն դիտարկմանը, թե հանձնաժողովի ուսումնասիրությունը ցույց է տվել, որ ֆաբրիկան դեֆիցիտի օրերին 760 հազար հատ ձու է ունեցել, սակայն շուկա չի առաքել, պարոն Եփրեմյանն ասաց. «Շատ ճիշտ է: Բայց այդ օրերը ուրբաթ, շաբաթ, կիրակի էին: Մենք չէինք կարող հավերին հասկացնել, որ երբ հիմնարկը չի աշխատում՝ ձու չածեն: Մենք շաբաթ եւ կիրակի օրերին ունեցել ենք հավաքագրած 900 հազար հատ ձու: ՏՄՊՊՀ–ն իր հարցն էլ ճիշտ չի ձեւակերպել: Մեզ հարցնում են, թե ինչու կիրակի օրը չենք աշխատել: Ի՞նչ է, դրա համար պետք է մեզ պատժեի՞ն: Մենք ենք որոշում աշխատենք, թե՝ ոչ: Մենք, իրոք, շաբաթ եւ կիրակի չենք աշխատել, բայց երկուշաբթի հավկիթներն ուղարկվել ենք խանութներ: Եթե մենք նման միտում ունենայիք, ապա պարզապես մեր մեքենաները կկանգնեցնեիք մաքսատանը: Իրենք ժամանակային առումը չէին հաշվարկել: Նրանք մտածում էին, որ եթե մենք հիմա ունեինք, օրինակ, 500 հատ ձու, ապա 5 րոպեից պետք է դրանք խանութներում լինեին, ասենք՝ Քաջարանի»:
ՏՄՊՊՀ-ից Aravot.am-ին հայտնեցին, Վճռաբեկ դատարանը հանձնաժողովի 5 միլիոն դրամ տուգանքը իրավաչափ է համարել, ավելին՝ դատական նիստերի ընթացքում օրենքի նոր խախտումներ են հայտնաբերվել: Ինչ վերաբերում է ՏՄՊՊՀ-ի կիրառած 100 միլիոն դրամի տուգանքին, ապա դատավարությունը շարունակվում է:
Կարդացեք նաև
Անուշ ԽԵՉՈՅԱՆ
