Ամբողջ աշխարհում կենդանապաշտպան կազմակերպությունները ահազանգում են, որ երկրի վրա շուտով մսի պաշարները կվերանան ու մարդիկ ստիպված պետք է բուսակեր դառնան: Այդ իսկ պատճառով, օրինակ, Հոլանդիայում առաջարկում են տավարի, ոչխարի, խոզի եւ այլ «ուտելի» մսի փոխարեն վերամշակված որդեր ու մորեխներ ուտել: Իսկ այլ երկրներում, մսի փոխարեն գորտ, սոյայից պատրաստված խառնուրդներ եւ այլ մեթոդներ են առաջ քաշում:
Հաշվի անելով այն, որ հայերը մսակեր են, Aravot.am-ը այսօր «Հայրենական ապրանք արտադրողների» միության նախագահ Վազգեն Սաֆարյանից հետաքրքրվեց, թե մենք մսի պաշարները պահպանելու համար ի՞նչ պետք է անենք եւ փոխարենն ի՞նչ ուտենք: Նա ասաց, որ ամեն ժողովուրդ իր ավանդույթն ունի. «Եթե չինացիները գորտ են ուտում, մենք հայերս դա չենք կարող ուտել: ՄԵնք բանջարեղեն կուտենք»: «Լուսակերտի թռչնաբուծական ֆաբրիկայի» նախկին տնօրեն Մանասե Եփրեմյանի կարծիքով էլ. «Բնությունն ինքը պահպանման մեթոդ ունի, չեմ կարծում, որ մսի դեֆիցիտ լինի ընդհանրապես, սովորական աժիոտաժ է, այդպես ուղղակի ուզում են զարգացնել մորեխաբուծությունը»:
Մեր այն հարցին, թե տեղական մսավաճառները բազմիցս շեշտում են, որ մանավանդ հունվար ամսին ամենուր մսի դեֆիցիտ է լինում, Վազգեն Սաֆարյանը պատասխանեց. «Եթե դեկտեմբերին ավելի շատ միս են վաճառում, քան հունվարին, պարզ է, որ հունվարին ավելի քիչ են մորթելու, ուստի դեֆիցիտ կառաջանա, բայց հունվարին միս քիչ ենք օգտագործում, որովհետեւ մինչեւ գոնե հունվարի 10-ը եղածն ենք օգտագործում: Մեր տանը, մինչեւ ամսի 10-ը ոչինչ չենք առնում, ոչ միս, ոչ հաց, ոչ ջուր»:
Անուշ ԽԵՉՈՅԱՆ
