Այսօր «Պոստ Սկրիպտում» ակումբում ՄԱԿ նախագահ Գուրգեն Արսենյանը կանխատեսեց, որ ՀՀԿ-ի համար խորհրդարանական ընտրություններին սպասվում է վատ անակնկալ: Նա կարծում է, որ այս անգամ ընտրությունները հիմնականում չեն կեղծվելու եւ հասարակությունը քվեատուփի առաջ արտահայտելու Է այն, ինչ զգում է ՀՀԿ-ի նկատմամբ:
ՄԱԿ-ը համագործակցություն չի բացառում ցանկացած քաղաքական ուժի, այդ թվում՝ Ռոբերտ Քոչարյանի հետ, բայց, հարցին ի պատասխան՝ եթե ՀՀԿ-ից հրավեր ստանաք, կարո՞ղ է հայտնվեք նրանց ցուցակներում, նա վստահեցրեց, որ ոչ:
Ըստ պարոն Արսենյանի, եթե ՀՀԿ-ն նորից ԱԺ-ում մեծամասնություն կազմի, մեր կյանքը սովորական հունով կընթանա, կգնանք հարսանիքի, կնունքի, նշանդրեքի, սովորական մեր գործերով կզբաղվենք,իսկ եթե ՄԱԿ-ը մտնի ԱԺ՝ բարդություններ կառաջանան, որովհետետւ կսկսեն զբաղվել խորհրդարանական աշխատանքով. «Ես որեւէ քաղաքական ուժի հետ համագործակցությունը չեմ բացառում, բայց էդ որոշումը կընդունեմ ընտրություններից առաջ այն ժամանակ, երբ արդեն կտեսնեմ նրան քաղաքական ձեւավորված շերտերում, որովհետեւ քաղաքական ուժն ունի տակտիկական մանեւրի հնարավորություն: Օրինակ՝ հիշեք ՀԱԿ–ի կողմից իրականացված տակտիկական մանեւրը. Մոռացե՞լ եք ՀԱԿ–ի երկխոսությունն իշխանության հետ, տասնյակ անգամ ողջունել եմ, ասել եմ՝ գնացեք իրար հետ խոսացեք, քչացրեք հասարակության ներսի լարվածությունը: Ավարտվեց հանրապետականի հետ խոսակցությունը՝ մանեւր արեց դեպի Բարգավաճ»: Մեր հարցին՝ ՀԱԿ-ԲՀԿ համագործակցությունը որքանո՞վ է հնարավոր, նա պատասխանեց. «Ոչ մի բան բացառված չէ»:
Հռիփսիմե ՋԵԲԵՋՅԱՆ
