Արթուր Բոլեյանի, Արմեն Քոչարյանի եւ Վահագն Ղազարյանի նկատմամբ հարուցվել էր քրեական գործ: Դեռ մեկ տարի առաջ դեկտեմբերի 24-27-ը Սեւանի բնակիչ Վահագն Ղազարյանից Բոլեյանը ձեռք էր բերել «Մակարով» տեսակի ատրճանակ՝ 6 հատ 9 մմ տրամաչափի մարտական փամփուշտներ: Հետագայում դրանք իրացրել էր Վարդենիկի բնակիչ Արմեն Քոչարյանին:
Ըստ մեր աղբյուրի, Արմեն Քոչարյանն էլ նախնական համաձայնության գալով Արթուր Բոլեյանի եւ Վահագն Ղազարյանի հետ, մտադրվել էր Մարտունիի բնակիչ Կամո Ալեքսանյանից ավազակային հարձակմամբ հափշտակել առանձնապես խոշոր չափերի հասնող 10. 827. 000 դրամին համարժեք 30.000 ԱՄՆ դոլար գումարը: Ճշտել էին, որ Կ. Ալեքսանյանն աշխատում է տարադրամի փոխանակման կետում, գիտեին նրա տուն գնալու ժամերը /ամայի դաշտերով, ոտքով, միայնակ, գիշերով/, ճշտել էին, որ «Ալեքսանյանը թուլակազմ, հիվանդ մարդ է»: Նաեւ այն, որ Ալեքսանյանի մոտ առկա է 30 000 դոլար գումար:
Տղաները Երեւանից Մարտունի էին «հրավիրել» Արթուր Բոլեյանին: Նրան էլ հատկացրել էին կրակայրիչ-ատրճանակ, «Մակարովը», բացատրել, թե ինչպես են հոպ-ստոպ անելու Ալեքսանյանին:
Ա. Բոլեյանը, սակայն, հանցագործությունը ավարտին չէր հասցրել:
Կարդացեք նաև
Սեւանցի Վահագն Ղազարյանն էլ իմանալով, որ Արթուրն ու Արմենը նախապատրաստում են ավազակային հարձակում կատարել տարադրամի փոխանակման կետի աշխատակցի վրա, վտանգավոր բռնություն գործադրելով, ըստ գործի նյութերի, «ստեղծում է պայմաններ»: Ղազարյանը իր մոտ պահվող «Մակարով» տեսակի ատրճանակը՝ 6 փամփուշտներով, տրամադրում է Արթուրին:
Ի դեպ, ատրճանակը տալիս է պայմանով, որ հանցագործությունը կատարելուց հետո իր ատրճանակը վերադարձվի, հետն էլ՝ 3000 ԱՄՆ դոլար:
Մինչ Արթուրն ամայի դաշտերով ու գիշերով կհետապնդեր իր զոհին, Ղազարյանն ու Քոչարյանը հաջողությունից «նստել էին ասեղի վրա»՝
ապակյա տարայի մեջ լցրած թմրանյութն իրենց երակներում «քամելով»:
Արթուրի նկատմամբ Գեղարքունիքի մարզի դատարանը համաներում է կիրառել, նրան դատարանի դահլիճից ազատել, իսկ մյուս երկուսի գործը գտնվում է դատարանում:
Ռուզան ՄԻՆԱՍՅԱՆ
