ԱԺ առաջիկա ընտրությունները կեղծվելու են: Այսօր Քաղաքական եւ միջազգային հետազոտությունների հայկական կենտրոնի եւ ԱՄՆ ժողովրդավարության ինստիտուտի կազմակերպած «Ինչպես դիմակայել ընտրակեղծիքներին» քննարկման ժամանակ նման կարծիք հայտնեց ՀԱԿ ներկայացուցիչ Ֆելիքս Խաչատրյանը: Նրա համոզմամբ, Հայաստանում մի մարդու կամքից է կախված ընտրությունների նորմալ անցկացումը, իսկ Ընտրական օրենսգիրքը չի երաշխավորում նորմալ ընտրություններ .«Ասում են՝ փիղը երկնեց, մուկ ծնեց, սա կարող եմ ասել մեր Ընտրական օրենսգրքի մասին: Այն կազմողները, անցկացնողները, քվեարկողները հետապնդել են երկու նպատակ՝ ավելացնել Կենտրոնական ընտրական հանձնաժողովի վարչարարական ռեսուրսները, հանձնաժողովի կոռուպցիոն հնարավորությունները ու լրացուցիչ սողանքներ ստեղծել կեղծարարության համար»:
ՀՀԿ ներկայացուցիչ Արտակ Զաքարյանն էլ հակադարձեց. «Մեզանում կարծիք է ստեղծվել, թե ամեն ինչում Ընտրական օրենսգիրքն է մեղավոր, բայց այդպես չէ: ԱԺ–ն պարբերաբար փոփոխություններ է արել օրենսգրքում եւ ընտրական գործընթացի համար պատասխանատու մարմինները ու մնացած բոլոր անձինք ունեն հնարավորություններ ազատ եւ արդար ընտրություններ անցկացնելու: Չեմ բացառում, որ կլինեն ուժեր, որոնք պարտվելուց հետո մեղքը կգցեն ընտրական գործընթացի վրա»:
Պարոն Խաչատրյանն էլ նորից կրկնեց. «նորմալ ընտրությունները մի մարդուց է կախված, բայց այդ կամքը ուղղված է ժողովրդի դեմ»:
Արփինե ՍԻՄՈՆՅԱՆ
