Ոստիկանության Գեղարքունիքի մարզի Սեւանի բաժնում նյութեր են նախապատրաստվում տեղի ունեցած վիճաբանության փաստով: Ինչպես Գեղարքունիքի մարզից Aravot.am-ին հայտնում է ֆոտոլրագրող Գագիկ Շամշյանը, ոստիկանության Սեւանի բաժնում օպերատիվ տեղեկություններ են ստացվել, որ դեկտեմբերի 4-ին Երևան-Սեւան ավտոմայրուղու վրա գտնվող Օրսետո ռեստորանային համալիրում՝ ժամը 17:00-ից 18:00-ի սահմաններում, մի խումբ անձանց միջեւ տեղի է ունեցել վիճաբանություն, որի ընթացքում, ըստ սեւանցիների, հնչել է մեկ կամ երկու կրակոց:
Ֆոտոլրագրող Գագիկ Շամշյանը հայտնեց, թե իրեն հայտնի է դարձել լուր, որը հաստատել են Սեւանի բնակիչները, ովքեր չեն ցանկացել ներկայանալ, սակայն պատմել են, որ նշված փաստով ոստիկանության Գեղարքունիքի մարզային վարչության եւ Սեւանի բաժնի աշխատակիցների կողմից ձեռնարկված օպերատիվ հետախուզական գործողությունների արդյունքում, այդ ռեստորանային համալիրում տեղի ունեցած վիճաբանության առնչությամբ արդեն մի քանի հոգի բերման են ենթարկվել ոստիկանության Սեւանի բաժին:
Սեւանցիները ֆոտոլրագրողին պատմել են, որ վիճաբանության մեջ նշվում է տեղական կառույցի պաշտոնյաների զավակների անուններ, ինչպես նաեւ վիճաբանությանն ակտիվ մասնակցություն է ունեցել մի քանի անգամ՝ այդ թվում նաեւ ավազակային հարձակման համար դատապարտված, Սեւանում հայտնի «կեղծ բարերար» անվամբ Ռազը:
Ֆոտոլրագրողին հայտնի է դարձել, որ հնչած կրակոցների հետեւանքով հրազենային վնասվածք է ստացել ինչ-որ անձ, ինչի մասին հայտնել են սեւանցիները, սակայն հիվանդանոցային ոչ մի համալիրից ոստիկանություն ահազանգ չի ստացվել:
Սեւանցիները պատմել են նաեւ, որ կրակոց արձակողը եղել է «Բարգավաճ Հայաստան» կուսակցության համակիրներից մեկը։
