«Ժառանգություն» կուսակցության առաջնորդ Րաֆֆի Հովհաննիսյանը երեկ ՀՀ ԱԺ-ում, ի պաշտպանություն խմբակցության կողմից խորհրդարանի նախագահի պաշտոնում Լարիսա Ալավերդյանի թեկնածությանն ասաց, թե «Ժառանգության» կողմից նրա առաջադրման հիմնական նպատակը ԱԺ նախագահի պաշտոնում, այլընտրանքային ընտրություններ անելու հնարավորություն ստեղծելն, ու հանրության վստահությունը խորհրդարանի նկատմամբ վերականգնելն է: «Գնահատելով ԱԺ փոխխոսնակի երկար տարիների ծառայությունները խորհրդարանին, իր կուսակցությանն ու մեր պետականությանը՝ միաժամանակ ես շատ հպարտ եմ պաշտպանելու Լարիսա Ալավերդյանի թեկնածությունը»,- հայտարարեց Ր. Հովհաննիսյանը:
Այսպիսով, երեքշաբթի օրը ԱԺ-ում խորհրդարանի նոր խոսնակի ընտրություններում, առաջադրվել է երկու թեկնածու. Սամվել Նիկոյանը՝ ՀՀԿ-ի կողմից, եւ Լարիսա Ալավերդյանը՝ «Ժառանգություն» խմբակցության կողմից: Խորհրդարանական խմբակցություններից ՀՀԿ-ն, ԲՀԿ-ն եւ ՕԵԿ-ը մտադիր են պաշտպանել Սամվել Նիկոյանի թեկնածությունը, «Ժառանգությունը»՝ բնականաբար, Լարիսա Ալավերդյանի: Իսկ ահա ՀՅԴ-ն, երեկ այս ընտրությունների եւ առաջադրված թեկնածուների վերաբերյալ ելույթներ չունեցավ: Խմբակցության պատգամավոր Արա Նռանյանը «Առավոտի» հարցին ի պատասխան ասաց, թե իրենք առայժմ այս հարցի վերաբերյալ ասելիք չունեն:
