Ս.թ. դեկտեմբերի 2-ի «Առավոտ» օրաթերթի համարում լույս տեսած ««Դեմ» լինելով` «կողմ» են» վերտառությամբ հոդվածում տեղ են գտել իրականության հետ կապ չունեցող տեղեկություններ: Մասնավորապես հոդվածում նշվել է, որ «Առաջին նախագահի քաղաքագիտական վերլուծությունը՝ ՀԱԿ–ի եւ ԲՀԿ–ի հետագա հնարավոր համագործակցության մասին, թերեւս անակնկալի բերեց նաեւ ՀԱԿ ղեկավար մարմինների ներկայացուցիչներին, քանի որ «Առավոտի» տեղեկություններով՝ ՀԱԿ կենտրոնական գրասենյակում այդ թեմայով քննարկումներ չեն եղել: Միայն առանձին ներկայացուցիչների հետ զրույցում է թեման արծարծվել, եւ ոմանք «դեմ» են արտահայտվել ԲՀԿ–ի հետ որեւէ պայմանով անգամ համագործակցելու հեռանկարին»:
Այս կապակցությամբ հարկ ենք համարում նշել հետևյալը: Հոկտեմբերի 28-ի հանրահավաքին նախորդող օրերին Հայ Ազգային Կոնգրեսում տեղի է ունեցել վերը նշված թեմային նվիրված երեք լիագումար նիստ, որից երկուսը` նախագահ Տեր-Պետրոսյանի գլխավորությամբ: Արդյունքում հարցի կապակցությամբ ձևավորվել է մեծամասնություն, բայց չի կայացել լիակատար կոնսենսուս: Այդ իսկ պատճառով հարցի արծարծումը Լևոն Տեր-Պետրոսյանը հետաձգել է, իսկ նոյեմբերի 28-ի հանրահավաքում այն ներկայացրել է որպես իր անձնական տեսակետ` համապատասխան հիմնավորմամբ:
Ըստ այդմ` օրաթերթի` անհայտ աղբյուրին հղված տեղեկությունները կեղծ են: Իրականության հետ կապ չունեն նաև հոդվածում հիշատակված Կոնգրեսի ղեկավար մարմինների ներկայացուցիչների դիրքորոշումների վերաբերյալ տեղեկությունները:
Հայ Ազգային Կոնգրեսի
Կարդացեք նաև
Մամուլի ծառայություն
