Լոռու մարզի Կաթնառատ գյուղի բնակիչ Հայկ Հովհաննիսյանի ամբողջ ամառվա չարչարանքը ջուրն ընկավ. այրվել են Հովհաննիսյանների խոտի դեզերը: Մինչ հրշեջները տեղ կհասնեն, գյուղացիներն իրենց ջանքերով փորձել են մարել կրակը: «Ինչքան էլ ժողովրդին խնդրում ենք, որ բնակելի տների ու գոմերի կողքին խոտի դեզ չդնեն, չի լինում, ուղղակի պետք է զգույշ լինեն, ծխախոտի մնացորդը չնետեն պատահական վայրերում»,-բացատրում են Լոռու մարզի փրկարարական ծառայությունից:
Հովհաննիսյաններն օրեր առաջ զրկվել էին 2 կովից՝ թելադիոզ հիվանդության պատճառով: Կաթնառատում 10 խոշոր եղջերավոր կենդանի անկել է կերային թունավորման ու թելադիոզ հիվանդություն պատճառով: «Խոտը չորացման ընթացքում խոնավություն է պարունակել, բորբոսման պրոցես է առաջացել, որը թունավորման պատճառ է դարձել»,- ասում է Լոռու մարզպետարանի գյուղատնտեսության եւ բնապահպանության վարչության գյուղատնտեսության բաժնի առաջատար մասնագետ Արմեն Գասպարյանը:
Քանի որ 2 վարակ կա ու երկու պատճառ՝ մասնագետները չէին կողմնորոշվում, թե ինչ հիվանդության հետ գործ ունեն: Նմուշառումներն ուղարկվել են մայրաքաղաք, իսկ մինչեւ պատասխան կստացվի՝ գյուղացիները մորթել են հիվանդ անասուններին եւ միսը վաճառել երշիկի արտադրամասին: «Ոչ մի գյուղացի չի սպասի, իր անասունը հյուծվի, նոր մորթի: Ու եթե արգելեն մորթել, մեկ է՝ թաքուն է մորթելու ու վաճառելու»,-ասում է Արմեն Գասպարյանը:
Նա բացատրում է, որ հատկապես տավարի միսը, որ անպայման եռացվում-մանրէազերծվում է՝ առողջության համար վտանգ չի ներկայացնում:
Կարդացեք նաև
Լոռու մարզի Տաշիրի տարածաշրջանի անասնաբուժական ծառայությունը կենդանիների անկման պատճառը անփութությունն է համարում` գյուղացիները ժամանակին չեն կատարել անհրաժեշտ պատվաստումները:
Նելլի ԴԱՎԹՅԱՆ
Հ.Գ.- Լոռու մարզի Ագարակ գյուղի 3 տնտեսությունն էլ զրկվել է անասնակերից ու գյուղացիները ճար չունենալով՝ մորթում են անասուններին: Լուրերը, թե նրանց պահեստավորած խոտի դեզերը ինչ-որ մեկն այրել է ու սա դիտավորություն է՝ հաստատվել են: Գյուղում ասում են, որ անգամ կա ձերբակալված կասկածյալ: Մանրամասները՝ առաջիկայում:
