ՆԱՏՕ-ի խորհուրդը Կոսովոյի սերբերից ակնկալում է Սերբիայի նախագահ Բորիս Տադիչի՝ բարիկադները քանդելու կոչերի կենսագործում: ИТАР-ТАСС-ի փոխանցմամբ՝ այդ մասին ասված է Հյուսիսատլանտյան դաշինքի այսօր տարածած հայտարարության մեջ:
«ՆԱՏՕ-ն եւ խաղաղապահ ուժերը խորապես մտահոգված են Կոսովոյի հյուսիսային հատվածում իրադարձությունների զարգացմամբ: Խաղաղապահ ուժերի նկատմամբ ուժի գործադրումն անընդունելի է: ՆԱՏՕ-ի խորհուրդը ողջունում է Սերբիայի նախագահ Բորիս Տադիչի` նոյեմբերի 29-ի կոչը, որը պետք է վերածվի կոնկրետ գործողության»,- ասված է ՆԱՏՕ-ի խորհրդի հայտարարության մեջ:
Հյուսիսատլանտյան դաշինքի խորհուրդը նաեւ դիմել է բոլոր կողմերին` պահանջելով «զսպվածություն պահպանել եւ համագործակցել Կոսովոյում գործող միջազգային կառույցների հետ, որպեսզի անհետաձգելիորեն ապահովվի տեղաշարժի ազատությունը»:
Հիշեցնենք, որ Կոսովոյի՝ սերբերով բնակեցված հատվածում իրավիճակը մնում է լարված, իսկ անցած հանգստյան օրերին տեղի երիտասարդների ու ՆԱՏՕ-ի խաղաղապահ ուժերի միջեւ տեղի են ունեցել բախումներ եւ անկարգություններ: Ի դեպ, Կոսովոյում տեղակայված խաղաղապահ ուժերի թիվն այսօր 6,25 հազար է:
