Հարավային Օսիայի նախագահի թեկնածու Ալլա Ջիոեւան, որն իրեն նախագահական ընտրություններում հաղթող է հռչակել , երկրի գործող նախագահ Էդուարդ Կոկոյտիից պահանջել է մինչեւ հինգշաբթի երեկոյան, ժամը 18:00-ը ճանաչել ընտրություններում իր հաղթանակը: Վերջինս, ինչպես BBC-ին է փոխանցում, պատասխանել է, թե վերջնագրեր չի հանդուրժի:
Իսկ Կոկոյտիին փոխանցած վերջնագրում Ջիոեւան զգուշացրել է, որ եթե հինգշաբթի օրվա ընթացքում իր հաղթանակը չճանաչվի, ապա ինքը վայր կդնի իր կողմնակիցների հետագա գործողությունների համար պատասխանատվությունը:
Հիշեցնենք, որ այսօր Ջիոեւայի հարյուրավոր կողմնակիցներ կրկին հավաքվել էին Ցխինվալի կենտրոնում: Ինչպես հաղորդում են լրատվական գործակալությունները եւ ականատես բլոգերները, սկզբում ցուցարարները ներխուժել են Հարավային Օսիայի կառավարություն, հետո «գրավել> կենտրոնական հրապարակը:
Ջիոեւայի կողմնակից, այդ երկրի պաշտպանության նախկին նախարար եւ Անվտանգության խորհրդի քարտուղար Անատոլի Բարանկեւիչը ցուցարարներին կոչ է արել «չտրվել սադրանքների» եւ այլեւս կառավարություն ներխուժելու փորձ չանել:
Կարդացեք նաև
Ընդսմին, ինչպես փոխանցում է ИТАР-ТАСС-ը, Ցխինվալի կենտրոնական հրապարակում արդեն իսկ տեղակայվել է զրահատեխնիկա, իսկ հրապարակը շրջապատված է հատուկ նշանակության ջոկատի դիմակավոր եւ ավտոմատավոր աշխատակիցների կողմից, շենքերի կտրուներին նկատվել են նաեւ դիպուկահարներ:
