Transparency International ոչ կառավարական կազմակերպության կողմից հինգշաբթի հրապարակված ամենամյա զեկույցում, կոռումպացված երկրների դասակարգման աղյուսակում Ռուսաստանն այս տարի 11 կետով բարելավել է իր դիրքերը: Նախորդ տարի նա գերազանցել էր իր իսկ սահմանած ցավալի ռեկորդը՝ դասակարգման աղյուսակում հայտնվելով աֆրիկյան երկրների կողքին:
Reuters-ի փոխանցմամբ, աշխարհի 183 երկրների դասակարգման աղյուսակում ՌԴ-ն անցած տարվա 154-րդի փոխարեն, այս տարի 143-րդ հորիզոնականը կիսում է նախկին խորհրդային երկրների՝ Ադրբեջանի եւ Բելառուսի, նաեւ աֆրիկյան մի քանի պետությունների հետ:
Այդուհանդերձ, Transparency International-ը առաջարկել է շատ չուրախանալ՝ հայտարարելով, թե ՌԴ-ում իրական բարեփոխումների մասին կարելի կլինի խոսել «միայն այն ժամանակ, երբ բոլոր օրենքները կկիրառվեն անխուսափելիության սկզբունքով եւ ոչ ընտրողաբար»՝ հավելելով, որ «առայժմ իրավիճակը Ռուսաստանում հղի է զանգվածային հուզումներով»:
Աշխարհի կոռումպացված երկրների ցանկում Հայաստանն այս տարի 129-րդն է: Դասակարգման աղյուսակը գլխավորում է Նոր Զելանդիան, եզրափակում են Հյուսիսային Կորեան եւ Սոմալին:
