Տեղեկացրել էինք, որ այսօր ՀՌԱԿ ատենապետ Էդվարդ Անտինյանը եւ Արմենական-ՌԱԿ ատենապետ Հակոբ Ավետիքյանը ստորագրեցին ՀՌԱԿ եւ Արմենական-ՌԱԿ կուսակցությունների միավորման մասին հուշագիր: Aravot.am-ը Աշխարհասփյուռ Ռամկավար Ազատական կուսակցության գործադիր-փոխատենապետ Հարություն Առաքելյանից երկու կուսակցությունների միավորման առնչությամբ մեկնաբանություն խնդրեց: Նշենք, որ չենք հրապարակում նրա պատասխանում առկա անձնական վիրավորանքները: «Չէր կարող ՀՌԱԿ-ը որեւիցե մեկին միավորվեր, քանի որ կուսակցության որեւիցե կառույց դրա մասին տեղյակ չէր, վաղը հանդես կգան հայտարարությունով: Էդվարդ Անտինյանը վտարված է կուսակցությունից, եւ նա քրեորեն պատժելի արարք է արել, ատենապետ դառնալու ժամանակ կեղծել է ստորագրություններ, որի մասին շուտով հայտարարությունով հանդես կգանք: Այսինքն՝ կատարել է քրեորեն պատժելի արարք` Քրեական օրենսգրքի 325 հոդվածն է` ստորագրությունը կեղծելու միջոցով լիազորություններ ձեռք բերել: Իսկ քանի որ Ավետիքյանի տղային Տիգրան Սարգսյանը դարձրել էր Կենտրոնական բանկի Իրավաբանական վարչության պետ (այս տեղեկությունը դեռ չի հաջողվել ճշտել պրն Ավետիքյանից.- Լ. Խ.), երկուսն էլ ունեն պարտավորություններ Տիգրան Սարգսյանի հանդեպ, հետեւաբար սա կրում է շատ ապատեղեկատվություն, էսպես բնույթ է կրում, այսինքն՝ սա Տիգրան Սարգսյանի շատ թույլիկ պատասխանն է, որը հեռանկար չի կարող ունենալ»,- արձագանքեց նա:
Այսօրվա ասուլիսում Հ. Ավետիքյանը միավորման քայլը պայմանավորեց այն հանգամանքով, որ ՀՌԱԿ եւ Արմենական-ՌԱԿ կուսակցությունները հանդիսանում են Ռամկավար Ազատական գաղափարախոսության եւ նրա արժեքների կրողներ: Հարություն Առաքելյանն այս մասով էլ ասաց. « Նա դեռեւս հանդիսանում է օտար պետության քաղաքացի եւ, արհամարհելով Սահմանադրությունը՝ զբաղվում է քաղաքականությամբ: Երկուսն էլ խնդիր ունեն Հայաստանի օրենքի հետ, եւ իրենք էլ լավ իմանալով դրա մասին, որպես պաշտպանություն, հանրությանը հիմարի տեղ դնելու գործընթացներ են անում»:
Հարցին էլ, թե երկու կուսակցությունների միավորումն առաջիկա ընտրություններում ի՞նչ ազդեցություն կարող է ունենալ, պատասխանեց. «Ծիծաղ, բարձր ծիծաղ կառաջացնի, ուրիշ ոչինչ: Ես ասում եմ` երկու կուսակցություն չեն միավորվել, Էդուարդ Անտինյանը Հակոբ Ավետիքյանի հետ միասին չորսուկես մարդ են անում: Երեքուկես Ավետիքյանն է, մեկուկես` Անտինյանը: Եթե չորսուկեսը կուսակցություն եք համարում, դա ձեր գործն է, համենայնդեպս հայ ժողովրդի ճակատագրի հետ ոչ մի աղերս չեն կարող ունենալ, նրանք իրենց անձնական պարտքերն են տալիս Տիգրան Սարգսյանին»:
Կարդացեք նաև
Լուսինե ԽԱՉԱՏՐՅԱՆ
