Կառավարությունն այսօր ներկայացրեց 2012թ. պետական բյուջեի նախագծի վերջնական տարբերակը: Ըստ Հայաստանի ֆինանսների նախարար Վաչե Գաբրիելյանի՝ փոփոխությունների արդյունքում եկամուտները ու ծախսերը ավելացել են 1,6 միլիարդ դրամով: «Եկամուտները կկազմեն 911,6 միլիարդ դրամ, ծախսերը՝ 1 տրիլիոն 44,1 միլիարդ դրամ, իսկ դեֆիցիտը ՝ 132,5 միլիարդ դրամ»,- ասաց պարոն Գաբրիելյանը: Անդրադառնալով ԱԺ -ում անցկացված պետբյուջեի քննարկումներին՝ նա ասաց, որ պատգամավորներից ստացել են մոտ 500 առաջարկներ: Առաջարկել են եկամուտներն ավելացնել մոտ 1 տրիլիոն 800 միլիարդ դրամով, լրացուցիչ ծախսերը՝ 415 միլիարդ դրամով: Նախարարի խոսքերով, լրացուցիչ ծախսերը վերաբերել են սոցիալ-մշակութային եւ գիտական ոլորտներին: Առաջարկներ են եղել նաեւ 81 միլիարդ դրամով ավելացնել ծախսերը տնտեսության ճյուղերում:
Առաջարկվող ծախսերից 51 միլիարդ դրամը բաժին է ընկել ուժային կառույցներին, 32 միլիարդ դրամը՝ պետական չինովնիկներին, 3 միլիարդ դրամն էլ՝ արտաքին հարաբերություններին:
Կառավարությունը լսել է բոլոր առաջարկներն ու խոստացել քննարկել առաջիկա տարիների ծրագրերում: Բայց պետբյուջեի նախագծի եկամտային մասի համալրմանը վերաբերող առաջարկները մերժել է՝ ոչ հիմնավոր լինելու փաստարկով: «Տրիլիոնային ավելացումներն իրատեսական չեն»,- ասաց նախարարը:
Արփինե ՍԻՄՈՆՅԱՆ
