«Ժառանգություն» խմբակցության ղեկավար Ստյոպա Սաֆարյանը երեկ մեզ հետ զրույցում տեսակետ հայտնեց, որ ԲՀԿ-ականների ու ԲՀԿ-ամերձների ձերբակալություններն ուղղորդված են նախագահականից. «Որովհետեւ եթե ձերբակալելու լինեին, մի երկու հոգու էլ Հանրապետականից կձերբակալեին։ Իրենք սրբերի սուրբը չեն, եւ, ասենք, Սուրեն Խաչատրյանի դեպքում պիտի տեսնեինք մարզպետ ձերբակալված։ Հենց էստեղից է երեւում, որ ուղղորդված են էդ գործողությունները։ Եթե իրենց շարքերում էլ տեսնեի զտման գործընթացը, հնարավոր է կողմ արտահայտվեի, ասեի՝ իշխանական երկու կուսակցությունները մաքրվում են։ Մի բան ակնհայտ է՝ իրենց աչքի գերանը չեն տեսել, ԲՀԿ–ի աչքի փուշն են տեսնում, ինչից էլ եզրակացությունը մեկն է, որ այդ ձերբակալություններն ուղղորդված են»։
Ըստ Ստեփան Սաֆարյանի՝ ԲՀԿ-ի դեմ արշավի սրացմանը նպաստեց Լեւոն Տեր-Պետրոսյանի վերջին առաջարկը։ Բացի դա, ըստ նրա, «նկատելի է, որ կա ինչ–որ մի ժամկետ, որը որքան մոտենում է, ՀՀԿ–ԲՀԿ հարաբերության լարվածությունն ավելի է մեծանում»։ «Ժառանգության» ներկայացուցիչը կարծում է, որ խոսքն ի վերջո համամասնական ցուցակով ընտրություններին մասնակցելու ՀՀԿ ծրագրի մասին է, որն ավելի հստակ կդարձնի ապագան ՀՀԿ-ի համար։ «Ի վերջո ԲՀԿ–ն պետք է պատասխանի՝ համաձայնո՞ւմ է երկրորդ տեղում լինել համամասնական ցուցակում, թե՞ ոչ։ Իրականում կոալիցիոն հուշագիրը խոսում է սրա՝ իշխանական ուժերի դասավորվածության մասին։ Համամասնական ցուցակը դարձել է երաշխիք ՀՀԿ–ի համար՝ ունենալ ԲՀԿ–ի համաձայնությունը երկրորդը լինելու առումով եւ անակնկալներ չմատուցել ընտրությունների նախաշեմին։ Պատահական չէ, որ պատասխանն ուշանալու պատճառով գործընթացներն ավելի մեծ թափ են ստանում»,- ասաց Սաֆարյանը։
Մարինե Խառատյան
Կարդացեք նաև
«Հրապարակ»
