Այսօր երեկոյան «Արամի խաչմերուկ» շարժումը Երեւանի Արամի 30 հասցեում գտնվող շինության քանդման դեմ կազմակերպել էր հերթական բողոքի ակցիան: Չնայած այն հանգամանքին, որ ճարտարապետ Աշոտ Ալեքսանյանը նախապես պայմանավորվել էր ներկայացնել այլընտրանքային նախագիծ, որն այնուհետև պետք է քննարկվեր Երևանի քաղաքաշինական խորհրդում, այսօր Արամի 30 հասցեում գտնվող շենքն արդեն ցանկապատվել էր:
Եւս մեկ պատմամշակութային արժեք կոչնչանա
Ակցիայի մասնակիցները թղթերի վրա գրված երկտողերով իրենց մտահոգություններն էին հայտնել
«Հույս չեմ դնում ո’չ նորանշանակ քաղաքապետի, ո’չ վարչապետի, ո’չ էլ իշխանությունների վրա եւ համոզված եմ, որ այս շենքը քանդելու են: Հասել ենք այն աստիճանի, որ կառուցապատող, շինարար հայ ազգը դարձել է պատմություն, մշակույթ ոչնչացնող ազգ: Եթե մենք 29 պատմամշակութային հուշարձաններ քանդեցինք Հյուսիսային պողոտայի կառուցապատման համար, ինչպե ՞ս այսօր կարող ենք հորդորել ու ասել` այդ սրիկա ադրբեջանցիները, թուրքերը քանդում են մեր խաչքարերը»,- Aravot.am-ի հետ զրույցում պատկան մարմիններին հարցնում է «Պետական կարիքների զոհեր» հ/կ-ի նախագահ Սեդրակ Բաղդասարյանը: Նա գտնում է, որ պատմամշակութային հուշարձանների մասով Մշակույթի նախարարությունը պարտադիր պետք է միջամտի, սակայն, ըստ նրա. «Ցավալին այն է, որ հանրային գերակա շահ ճանաչված տարածքներում հաշվի չի առնվում նախարարության կարծիքը: Պատմամշակութային հուշարձանների պահպանումն է գերակա շահը, բայց մենք այսօր ունենք հակառակը»:
Լուսինե ԽԱՉԱՏՐՅԱՆ
