Եվրամիության քաղաքացիների 71 տոկոսը չի հավատում առաջիկայում ճգնաժամը հաղթահարելու ԵՄ իշխանությունների ունակությանը: РИА -Новости-ի մատուցմամբ, այդ մասին հաղորդել է Եվրահանձնաժողովը՝ վկայակոչելով եվրոպական երկրների բնակիչների շրջանում անցկացված հարցախույզը:
ԵՄ աշխատանք ունեցող քաղաքացիների ավելի քան մեկ երրորդը՝ 35 տոկոսը, վախենում է կորցնել իր աշխատանքը, 87 տոկոսը կարծում է, որ վերջին տարիներին աղքատության մակարդակն աճել է:
Ընդսմին, շուրջ 60 տոկոսը համարում է, որ աշխատանքը կորցնելուց հետո կկարողանա արագորեն նոր աշխատանք գտնել, իսկ 24 տոկոսը կփորձի սեփական բիզնես ծավալել: ԵՄ-ում 2008-ից ծայր առած տնտեսական ճգնաժամից եւ աշխատանք կորցնելուց ամենաշատը մտահոգված են Իսպանիայում՝ 72 տոկոս, Հունաստանում՝ 63 տոկոս եւ Լիտվայում՝ 61 տոկոս:
Հիշյալ հարցախույզն անցկացվել է ընթացիկ տարվա սեպտեմբերի 24-ից մինչեւ հոկտեմբերի 9-ը՝ բոլոր 27 անդամ երկրների տարածքում եւ ներկայացնում է 15-ից բարձր 26,7 հազար մարդու կարծիքը: Ընդհանուր առմամբ, ԵՄ-ում 15 տարեկանից բարձր բնակչության թիվը կազմում է 408,8 միլիոն:
